Ynne ka sngi u kyrtong ka Congress na Mowkaiaw Constituency u Nehemaya Tyngkan ha ka yalang ki 13 chnong wa da pynman ha Madan Phutbol Mooblang, Iooksi da ong u wa ynne ka sngi dei wan ki paidbah da ki hajar ngut dap u dei mynsien wa kmen wa mih ki wow pynjop ya oo.
Da kdaw u wa katni kiwa mihkhmat dei langær poi ki cha kani ka thaaiñ wow wan pynbiej ki da ki Scheme wa ka poisa tangwa ha ki por ki snem wa dadep ym em u poi ki tang chisien wot leh.
“Ki heh ka UDP da wan pynbiej ki da ki kyrdok pyndeiñ, da ki tin le ban tangwa boon bha kiwa kyrchaan ya nga katni na kiwi ki Party da emlang ki wa nga,” da ong u Nehemayah deiwa kyntu ya kiwi kiwa ympu em wa oo leh wow kyrchaan noh ki ya oo neibhah ki tin wa e toh ka bhah ka kynti yong ki paidbah lyngba ka dan wa boonjait wa chim ka sorkar. Da ong u leh wa lada ong u e yarap emkaam i ya ka knup, ki kajiar, ki dieñ wa kiwi kiwi deiwa kyrpaad u ya ki manbei manpa wa ymtoh u chah pynbiej donhi ki tangwa emkaam u pyrkhat ki neibynta ka mynried ki khon ki kti yong ki.
“Nga ym yoh O ka spah ka phaw tangwa em O ka spah i maya neibynta yong phi,” da ong u Nehemayah deiwa kynmoo u leh ya ka bei u hawa rem u du 300 Vote donhi kawa da ong ya oo tangwa ha kani ka kynti daw jop mi heitæ da hun O u yap, neibhah ya oo da kha ha kani ka thaaiñ wei ham kdaw yei duna yong oo emkaam wow yah luti u kdaw luti ya oo.
Da kyrpaad u ya ki paidbah wow kreh ki khlem dooh kyrmen ki tangwa emkaam wow kyrchaan bait ki ya oo dei maya neibhah mynstep mankawi yow ye u kreh leh dei maya.
Chooh chooh da pynkynmoo u ya ka sorkar kawa da kset ya ki paidbah ha ki ar snem heiwa da phah baam ka sorkar ya ki paidbah da ki jhoor hadooh wa da chitom ki paidbah wei kam ha kini ki por cheiwon wiar kiwa mihkhmat wow yarap ya ki paidbah tangwa manda emkaam ki ya ka Vote heitæ wan paan kyrchaan ki.
U Nehemayah da ong u leh wa boon kiwa mihkhmat kiwa ym em u chna ya ki aiñ wow yada wow pynku ya ka jaitbru yong i neibhah boonkaam ki du hei khih (Business) yong ki donhi kam ki High Level kiwa da kwah wow luchia ya sa ya ki mar ki warep ki Low Level kam kiwa khayi sy’iñ, saroo, rangaw hap lai ki dei miet dei synyaaw du wow lait ya ki High Level wa khrong poisa.
Chooh chooh da kdaw u ya ki khynroo kiwa kwah wow baamdoh kiwa paan T. 7,000 heiwa da ong u wa oo leh kwah u wow baamdoh lang wa ki ha yung u deiwa kyntu ya ki manbei manpa wa em i bahkhlieh ya jar jiar ki khon lada kani mo katæ ka Election deiwa lai baamdoh wow pynwyrngia iwi ya iwi wei khamtam ha i dih i baam pyrkhat ya ini dei miat næ.
Da ong u leh emkaam wow kyrchaan ki ya oo wow kreh ki dei maya khnang oo leh wow ye u kreh ya ki dei maya hanla em chiboon i duna yong oo wow pteiñ ki u yah luti ya oo wei wow kreh khlem sangeh.
Chooh chooh da kdaw u ya ka PHC ha Priang heiwa katkam ki kyndon emkaam u em ko 2 ngut ki Doctor wa 4 ngut ki Nurse tangwa manda poi ha kani ka thaw sumaar tang i dawai kjut khlieh leh ym yoh wei da phah ya kiwa kjut cha Jowai Civil Hospital.
Heijooh i por da pynsñiaw u yei mynsien wa sñiawsih hawa yoo ya ki tymmen chadæ wa khamtam ki khynnah wa kyrpang tangwa ym em kiwa mihkhmat ym jooh kyruiñ ki cha kam kini ki manyung.
Da ong u leh wa ki MLA wa ki MDC kiwa mih na ka Congress toh kiwa khlem yurim wei kiwa kwah myntoi samen donhi.
Ymtoh u sñiawphær neibhah u Nehemaya Tyngkan da chah tyrwa poisa u hadooh T.5 klur wa T. 7 klur tangwa ym em u randien u neibhah oo ym kwah u wow dai ya ka thaaiñ wa ka Mowkaiaw Constituency neibhah oo kwah u wow chakri ya ki paidbah na mynsien.
