Ka United Democratic Party (UDP) ha ka 30 tarik uni u bnai da pynbna ko ya ka thup wa ar yong ki kyrtong ki wow e reiñ ha ka Election MDC cha ki ar tylli ki Autonomous District Council (KHADC wa JHADC) kawa daw pynman ha u Thohlakhmi (Feb), 2025.
Ha ka thup kawa ar, da pynbna ya 9 ngut ki kyrtong ha ka yalang kawa da pynman ha yungkrehkaam ka seiñ kawa em ha Shillong.
Napyrdi kini ki kyrtong, 6 ngut ngut toh kiwa na ki Constituency yong ka Jaiñtia Hills Autonomous District Council (JHADC) wa 3 ngut won na ki Constituency ka Khasi Hills Autonomous District Council (KHADC).
Ki kyrtong cha ka JHADC kynthup ki ya u Medling M Swer na War East, u Kat Kassar na War Central, u Shlur Lamin na War West, u Damian S War na Mynsngat-Khanduli, u Rimilanki Synnah na Nartiang-Wahiajer wa u Wailad Siangshai na Musniang-Rangad.
Katwa cha KHADC, ki kyrtong toh u Suly Lyngdoh na Mawsynram, u Gilbert Laloo na Mylliem wa u Ryngkatlang Lyndem na Lyngkyrdem-Laitkroh.
Hadooh kattæ, ka UDP dadep ko wow pynbna 35 ngut ki kyrtong heiwa 19 ngut toh ki wow yakhun na KHADC wa 16 ngut won na JHADC.
Hawa klam ha ka yalang, u President ka UDP, u Metbah Lyngdoh da pynsñiaw u yei sñiaw skem wa ka UDP daw jop ko boon ngut ki MDC ha kani ka Election.
Hawa yaklam won hadien ka yalang wa u President ka UDP Shillong City, u Paul Lyngdoh da ong u wa ha ki Constituency kiwa haap hapoh sor Shillong, ka seiñ da pynyieñ kyrtong ko ha waroh 6 tylli ki Constituency, lait noh ha Mawlai Constituency wa ka seiñ ym em kyrtong de ko.
“Ha Mawlai da jia ryngkhat wa u kyrtong wa i da tyrwa wei ka seiñ da lai ko chakhmat, utæ u PT Sawkmie, da kynran noh u na ka seiñ yong i, wei ini da booh ko hei eh. Ini da pynchitom ko ya i kattu wow yoh da uwi won u kyrtong na Mawlai”, da ong u Paul.
Discussion about this post