Uwa e ktien ka Voice of the People Party (VPP), u Dr. Batskhem Myrboh da phah u ya ki heh sorkar wow puræ bha yaka aiñ Meghalaya Lokayukta, neibhah ym em thoh hapoh ka aiñ (Act) wa ki sahep hapoh ka Meghalaya Lokayukta u man kiwa dang em ha i kreh, heiwa da ong u wa katkam ka Meghalaya Lokayukta Act, da klam che ko wa ki sahep hapoh ka Lokayukta ymtoh u duna ki yaka kyrdan wa emkaam katkam wa da booh kyndon ka aiñ, wei ymphær lada dang kreh ki næ kiwa da chong-ngiah na i kreh sorkar.
Ka VPP da dawa ko na ka sorkar wow thung kreh biang ya 3 ngut ki Investigating Officer kiwa da chah pyndam kreh noh ha ka sorkar ha u Kmaichonglad (Dec) 2023, hajrong i kam wa ka aiñ ym chah ko ya kiwa da chong-ngiah wow man ki dkhot hapoh ka Lokayukta.
Yow pynjoor ya i dawa kiwa yahkhmat wa kiwa kyrchaan ka VPP da tia ki cha Secretariat ynne ka sngi, tangwa da chah khang luti noh ki ha ki pulit wa ki bor ka District neidaw wa pynkrehkaam yaka Section 144 CrPC.
U Dr. Ricky AJ Syngkon wa u Dr. Batskhem da ong ki wa ini i yakhih iwa dang sdang wei u pteiñ i hadooh wa yoh yei dawa.
U Dr. Batskhem da ong u wa ka VPP ymtoh wa mih sarok ko khlem puræ, heiwa da kylli ya ka sorkar MDA-II wa toh ka jooh ka sorkar wa thung ya kini kiwa da chah beh, wei da yoo ya i leh embor ka sorkar iwa ktah leh ya i krehkaam ka Lokayukta wei hadien habood daw dooh yei kreh bait iwa ryntih lada ki sahep chah pyndam ki kamwa man katni.
Discussion about this post