U Symbood Montri Rangbah ka jylla uwa pait yaka chnat PWD (Roads), u Prestone Tynsong ynne ka sngi da pyntip u wa ka sorkar da dep phah ko yaka Proposal cha ka Ministry of DoNER ka sorkar India nadooh u snem 2018 neibynta wow chna ya u sarok ha ka thaaiñ khappood wa ka ri Bangladesh, kitæ na Borkhat-Hingaria-Huroi ka wow mih cha Sonapur.
Da pyntip u wa hadien wa ka sorkar jylla da paan ko ya katai ka sarok, neiliang ka Ministry da bichaar ko ya itai i emkaam yong ka jylla, heiwa da paan leh kattu katni ki pynche wei ha kini ki kajiak sngi wa da dep neiliang ka sorkar jylla da dep ko wow pynbiang lut ya kiwa emkaam wa kynthup ya ka Detailed Project Report (DPR). Da pyntip wa neiliang ka Ministry katni da kohngooh ko wow kyrchaan poisa neibynta utai u sarok wei da booh hakhmat dooh ya utai u sarok wa lai na Borkhat-Hingaria-Huroi ka wow mih cha Sonapur.
Hawa kylli hajrong i pynbaad wa khlem pynlait ya ka poisa T.148 klur neibynta utai u sarok, u Prestone da ong u wa ym toh wow klam kam kiwa tip, neibhah ym pu mang ya ka poisa neibynta utai u sarok neibhah wa ka sorkar ka dang dep phah ko ya ki kot ki sla kiwa biang wa ka DPR, heiwa da pynrap u leh wa hadooh katni, ka sorkar jylla ym pu yoh yutip ko katwon da mang neibynta utai u sarok.
U Prestone da pynsñiaw u yei kyrmen wow yoh noh ya ka bhah poisa neibynta utai u sarok la kammon kammon ha uni u snem, heiwa da ong chooh chooh wa ka sorkar ka yakhun eh ko wow yoh ya utai u sarok neibhah wa tip yei eh ki paidbah ka thaaiñ khamtam ki warep.
