Shillong: Ka yalang yong ka State Election Committee ka United Democratic Party (UDP) ynne ka sngi da pynkhreh wei da mynjur ko ya ki mat Election MDC kawa da tip kam ka Mangkyntiew Ri namo Manifesto.
Ya kini ki mat wa kynthup i nadooh wow chimkhia ya ki kaam chnong kaam thaw, ki Hima, wow pyntikna wa ym em iwon iwon i chah thombor wei wow thooh laad thooh luti wow em i yakrehlang wa ka District Council.
U Senior Working President ka UDP u Bindo M Lanong hawa yaklam wa kiwa pathai khubor da ong u wa ka UDP daw chna ko ki laad ki luti hajrong ki khloo ki kjam, ka khyndaw ka chyiap wa ka dustur riti.
Da ong u wa kawon kawon ka kaam wa ktah ya ki paidbah ym leh ko tangwa daw paan yumut wei wow em ki i ya mynjur lang. Ka khayi pateiñ yong ki baar jylla leh daw pynwandur khamtam ha ki yaaw wa pynlai da ka Council wow khanglaad ya kiwa na baar.
U Bindo da ong u leh wa ka UDP daw pynwan dur wei daw pynkhlan ya ki Kasari chnong næ ki Village Court kiwa da jooh em tangwa kiwa ym em krehkaam de ha kini ki sngi.
Kawi won ka phang wow pynkrehkaam toh ya ka aiñ yut seiñ namo ka Anti Defection Law ha District Council wow khang ya ki MDC wow yut seiñ ki hadien wa jop.
Discussion about this post