Ka seiñ JNC da yachem ko wa u Symbood Montri Rangbah ka jylla, u Sniawbhalang Dhar ha kamra krehkaam u ha Shillong ynne ka sngi yow yaklam hajrong kiwa boon ki kaam wa dang sahteiñ khlem pyndep hapoh East wa West Jaiñtia Hills District kamjooh ki kaam wa yatoh wa ki chnong wa em ha khappood waka Assam.
Heiyatoh wa ka Block-I, u Sniawbhalang da pyntip u wa da dep ki wow phah chithi cha ka sorkar Assam yow pynuiñ biang ya ki chnong ki Pnar wa em ha Block-I wei dang yang ki yei jubab na ka Assam.
Heiyatoh waka Iawmusiang Market Complex ha Jowai da ong u wa da phah pait yei man kani ka yung hadooh i khlan ki chrot wa lada man ki kiwa da biang wow chna noh.
Hajrong won ka Mini Secretariat ha Jowai, da ong u wa ka chnat PWD da toh u pait, da dep ko wow pynkhreh yei pynwan dur wei ym slem de daw sdang noh.
Heiyatoh won waka Residential School waka Teacher’s Training Centre kiwa em ha Byndihati, East Jaiñtia Hills, da kular u wow chimkhia wei wow booddien leh wei daw khut yachem u ya u Montri ka thaaiñ u Kyrmen Shylla wow ya phyllu yumut hajrong ini.
Neiliang ka seiñ da yaroh ko chiboon ya u Symbood Montri Rangbah wa smat u wow chimkhia hajrong kini ki phang wa kyrpang wei khamtam kiwa ye u e yei chakri ya ki paidbah neibynta i myntoi ya ka thaaiñ wei kamjooh ya ka jylla hi waroh kawi.
Discussion about this post