Ka sorkar jylla da dep ko wow yaklam wa ka sorkar Assam wym toh u pynthut, u pyndik ya kiwa khayi masi yong ka jylla Meghalaya hawa pynkit ki ya ki masi na kiwi ki jylla lyngba ka Assam.
U Principal Secretary ka chnat Animal Husbandry wa Veterinary, u GHP Raju da ong u wa ka sorkar Meghalaya ka sñiawkhia ko hawa yatoh wa ka Section 7 yong ka Assam Cattle Preservation Act, 2021, kawa kdaw wa kiwa khayi masi hap ki wow yoh ya ka Transit Pass hawa lai ki lyngba na Assam.
Da ong u wa katkam katai ka aiñ yong ka sorkar Assam, ya ki Transit Pass kiwa khayi toh u yoh bait du na ka jylla Meghalaya, katwa iwa da phah, wa da pynmih da ka sorkar pyrdi man ko wa toh u pynsakhiat ya ki masi wa khayi na ki jylla wa da pynkit lada man ki kiwa biang næ ym em wow khayi wei lada man ki kiwa bha.
U Raju da ong u leh wa ka sorkar Meghalaya daw thoh ko cha ka sorkar Assam wow kdaw wa ka Section 7 hapoh ka aiñ man ko pyrchah ya iwa phah yong ka sorkar pyrdi, deiwa pynrap wa lada emkaam, ka chnat daw pynmih ko i pynbna hajrong katai ka phang khnang wa kiwa khayi na ka jylla ym chem ki yei eh.
Da ong chooh chooh wa ka chnat daw e ko ya ki Permit neibynta chipor cha kitu kiwa khayi wa toh hok wow pyntikna wa ki masi wa da wan pynkit na kiwi ki jylla ym toh wow chalan tooh won cha Bangladesh. Da ong chooh chooh u wa lada kiwa khayi masi ka jylla yachem ki yei eh ha Assam hawa yatoh wa i wanrah ya ki masi na kiwi ki jylla, ye ki wow pyntip bait cha oo, wei da ong u leh wa daw rah ya kani ka phang wow yaklam wa u Special Director General of Police ka Assam, u GP Singh uwa pait ya i krehkaam ka aiñ yada masi.
Hawa yatoh wa i ya khayi tooh ya ki masi cha Bangladesh, u Raju da ong u wa ha kini ki kjiak sngi wa daw wan daw lum ya ka yalang wa ki heh yong ki chipai BSF wow pynjoor yei khynra wei wow paitbniah ha ki thaw khappood, deiwa ong u leh wa i daw yong i ku dor i doh masi ha ka jylla toh neidaw wa em i chalan tooh cha Bangladesh.
