U Director General of Police (DGP) ka jylla, u Dr. Lajja Ram Bishnoi da ong u wa ka chnat pulit da e kti ko ya ka bui wa pura cha ka chnat ki kaam pohyung ka sorkar hajrong i pynbaad wa pynemkaam bakla hei wow thied wei pynemkaam ya ki kari ka chnat pulit.
U DGP da ong u wa ka chnat da phah ko ya ki pulit wow pynbiang leh ya ki kot ki sla wa emkaam hajrong ini i chah pynbaad ya iwa ki pulit dang pynbiang ki katni.
Hawa kylli, u DGP da ong u wa katni ympu beh kreh (Suspend) ya u pulit wa da chah pynbaad ha ini i kaam, tangwa hadien wa pynbiang ya ki kot ki sla wa kiwa emkaam waroh, ka sorkar daw chim ko ya ki rai katkam ki kyndon aiñ.
Kam wow kdaw heini wa u Assistant Inspector-General of Police (Administration) warim, u Gabriel K. Iangrai da chah pynbaad u wa da pynemkaam bakla u ya i bor heiyatoh wa i thied wa i pynemkaam ya ki kari pulit. Hajrong ini neiliang ka chnat da thung ko leh ya ka takit da ki 5 ngut, wei ya ka bui takit dadep e kti cha ka sorkar ynne ka sngi.
