Ka National People’s Party (NPP) da pynbaad ko wa ka Trinamool Congress (TMC) da wanrah ko da ki buit na West Bengal wow jop ya ka Election ha Meghalaya deiwa pynkulmar wei pyntieñ.
“Ha ka Election wa man ha u snem wa dadep ha West Bengal da em i chah tynyap, i pynmynsoo wa i thombor ha kylleiñ katai ka jylla,” da ong u NPP Shillong City Working President, u Manroi Bha Kharpuri.
Da ong u wa ka BJP kawa em ha ka liang pyrchah ha West Bengal, kamjooh ka seiñ Congress wa CPIM da ujor ki cha ki bor wow pynsangeh ya ki kulmar, wei iwa jia ha katai ka jylla da pynman i ya u Lat wow chimkhia yeini waroh.
“Kamwa jia ha West Bengal, yoo kamwa ha Meghalaya leh ye u sakhi ya kam ini i kulmar i wym jooh yoo,” da ong uni uwa yahkhmat ka NPP.
Katkam ki yutip wa da yoh da pynbaad wa kiwa kyrchaan ka TMC ynnin i miet da thombor ki ya ka kari u MDC ka NPP na Phulbari wa da wanrah ya i kulmar heiwa hadooh 9 ngut ki bru da mynsoo ki wei ini i awri da jia i heipor wa em u kyrtong ka TMC uwa man leh u MLA warim, u SGE Mominin.
Katkum ka bui (Report) wa da yoh na u District Election Officer ka West Garo Hills, ha ka miet yong ka 7 tarik da mih i kulmar hapyrdi ki ar liang, kitæ ka liang uwa kyrchaan ka NPP wa kiwa kyrchaan ka TMC ha ka chnong Charbatapara kawa dang haap hapoh ka Phulbari Assembly Constituency.
Ki bru ka TMC kiwa da em ha katai ka thaw wa em i kulmar toh u SGE Mominin uwa man u kyrtong kamjooh u MLA warim, u Moni Mondol, u Bhuttu, katwa nappyrdi ki bru ka NPP da em u Habibur Zaman uwa man u MDC uwa da emlang ha katai ka thaw.
Hadien wa yoh yutip yeini iwa jia, ki pulit ka Phulbari PS da poi ki ha ini i thaw wei da kit ya ki 9 ngut ki bru wa mynsoo cha Phulbari CHC, kiwa da lait noh hadien wa yoh sumaar, katwa uwi u bru wa tip kam u Nojrul Hoque da phah cha thaw sumaar wa paka neibhah da mynsoo u ha ini bynta hajan i khmat.
Hajrong ini i jia neiliang uwi u bru wa tip kam u Nozim Hussain da ujor u deiwa pynbaad wa u Habibur Zaman yong ka NPP kiwa da sangeh hajan i yung wa sah u, da tangon moo ki cha yung u wei ha ini da mynsoo 4 ngut ki bru.
U District Election Officer da pyntip u wa i daw yong ini i kulmar toh hadien wa ki kattu katni ngut kiwa kyrchaan ka TMC da lai sngoh ki ya ka kari Scorpio yong ki bru wa yah u Habibur Zaman kiwa da lai na ini i thaw.
