Jowai: U kyrtong ka NPP na 2-Jowai u Wailadmiky Shylla uwa man leh u boo yong u MLA warim ka 1-Nartiang Constituency u Sniawbhalang Dhar, hei yaklam wa kiwa pathai khubor da ong u wa ka manyung ka yong ki da jooh kyrchaan ko ya ka Congress wei da em i angnood wow lai na ka Congress tangwa da rai won wow mih noh na ka.
Yei daw wa rai wow mih noh na ka Congress u Wailad da ong u wa waroh toh neidaw ki yong ka hi wa khamtam i yalam u montri rangbah ka jylla u Dr. Mukul Sangma.
Da psiah won ki cha ka NPP toh hadien wa wan kani ka seiñ da yoo ki yei kaam yong ka hapoh i yahkhmat u Conrad K Sangma ym kwah de ki wow chong ha ka liang pyrchah hawa kwah ki u wanrah ya i roi i paar lada psiah ki cha kiwi tawon ki party.
Chooh chooh da ong u wa lada em iwon iwon i eh i khoo hapoh ka jylla ym emkaam de wow rah cha Delhi neibhah wa da em kiwa yahkhmat yong ka kiwa em pyn ha Delhi (MP ka Tura) weiwa ka Congress hi ympoi de ko heibor hapoh ka jylla kamtæ da theh bait waroh cha ka NPP.
Heiyatoh won wa u Sniawbhalang Dhar yakhun u wow yoh ya ka chuki kam u montri rangbah ka jylla u Wailad da ong u wa itæ chong i ha ki bor ka party wa ha jrong wei ympu ye u rai yeini.
Neiliang won u District President ka seiñ u O. Lamin uwa da emlang ha kani ka janmiet wa u Wailad da ong u wa kam uwa na ka thaiñ ri-loom Jaiñtia waroh kwah ki wow yoh ya u montri rangbah na kani ka thaiñ neibhah wa hadooh katni kani ka thaiñ ympu jooh em uwon uwon uwa yoh u ksoh ya kani ka chuki.
Chooh chooh u Lamin da ong u ya ini i kaam chong ko heiwa kammon jied ki paidbah ya kiwa mihkhmat yong ki.
Da pynkut u deiwa ong wa yi wym kwah wow yoh montri rangbah hawa da yoo da sakhi katni kammon ka myntoi yoh ki paidbah ka thaiñ hawa yoh ko u montri rangbah ka jylla.
Discussion about this post