Kiwa em Aadhaar hapoh ka Meghlaya da em ki 43.38% katkam wa pyntip u Symbood Montri Rangbah ka jylla u Prestone Tynsong hapoh ka dorbar mang tyngka ynne ka sngi.
Ya ini da juba u Prestone haka Zero Hour Notice wa wanrah da u MLA ka Congress na Mawlai, u Process T Sawkmie.
Neiliang u Prestone da ong u wa, “Hanla duna kiwa em ya u Aadhaar, ka sorkar da sdang ko wow leh Aadhaar neibynta ka National Food Security Act (NFSA) ya kitu kiwa em card rachon hapoh ki Public Distribution System (PDS) wei kini kattæ da em ki 16.60% kiwa da em Aadhaar.”
U Tynsong da ong u leh wa ka 16.06% toh 69,975 ngut kiwa em NFSA Ration Card na ki 4,21,505 tylli ki card rachon.
Da pyntip u leh wa i chondur Aadhaar wa ki pynsñiawthooh paidbah toh kiwa dang lai chakhmat khamtam ki myntoi wow yoh neiwa pynkrehkaam yaka One Nation One Ration Card.
Da pyntip u leh wa da em uwi uwa na Bihar uwa da yoh myntoi hapoh ka jylla nadooh u Kmaichonglad (Dec) 2020, naka One Nation One Card uwa da yoh yei yong oo i hok rachon.
U Prestone da pyntip u leh wa hapoh ka One Nation One Ration Card, daw yarap ko ya kiwa mylla kiwa wan na baar jylla kamjooh ki warep wow yoh ki yaka rachon la em ki ha iwon iwon i bynta ka ri na ki dukan rachon (Fair Price Shop).
Kamtæ u Prestone da ong u wa yow krehkaam ka One Nation One Ration Card ka sorkar daw hap ko wow boh yaki kor wa emkaam wa tip kam ki Electronic Point of Sale (e-POS) ha waroh ki Fair Price Shop kamjooh wow pynyoh Aadhaar ya kiwa em card rachon ka NFSA.
