Ka yalang Consultative Meeting wa da pynman da ka Election Commission of India wa ki sahep ka jylla wa hap pynman ya ka Election chiteiñ samoi (By Election) da chim ko ya ka rai wa ympu pynman ya ki ar tylli ki Election ha ka jylla Meghalaya.
Ka jylla Meghalaya hap pynman ko ya ki ar tylli ki Election hadien wa ki ar ngut ki MLA da khlaad ki ha uni u snem wei kitæ kynthup ki ya u David Nongrum ka Mawryngkneng Constituency uwa da khlaad syndet ha ka 2 tarik u Thohlakhmi wa u Dr. Azad Zaman ka Rajabala Constituency uwa da khlaad noh ha ka 3 tarik u Wisu.
Hawa yaklam wa u Chief Electoral Officer ka jylla, u Federick R Kharkongor da ong u wa ka ECI ha ka yalang wa emlang u Chief Secretary wa kiwi ki sahep ka Meghalaya, da paan yumut ka ECI na ki jylla wa hap pynman ya ka Election deiwa bichaar bniah ya i man i long. Da pyntip u wa hadien wa ka ECI da yoh ko yei batai da rai ko wow pynman ya ka Election du ha West Bengal, katwa ha ki 31 tylli ki Constituency yong kiwi ki Jylla da hap pynsangeh chwa khamtam neidaw wa dang em kiwa chah ktah ha u COVID-19 wa i chlai um.
Da ong u wa ha Meghalaya katkam i pyntip u Deputy Commissioner ka West Garo Hills, ka Rajabala Constituency da em ko ha i chlai um heiwa da em kamwa 23 tylli ki Polling Station kiwa da chah ktah katwa ha Mawryngkneng kawa haap hapoh East Khasi Hills da hap pynsangeh chwa hadien i syllok wa ka chnat i chait i khiah wa dang em boon kiwa dang chah ktah ha u COVID-19.
U Kharkongor da ong u leh wa ha waroh ar tylli ki Constituency wa hap pynman Election biang, da em hadooh 60% kiwa da chim tika ya iwa emkaam wow pynku chooh chooh cha kamwa 90% neibynta wow chngaaiñ ki paidbah wa kiwa kreh ka chnat.