Jowai: Ynnin ka sngi ka 24 tarik ha ka yalang yalap Election u Nujorki Sungoh u kyrtong ka UDP na ka 4-Mowkaiaw Constituency kawa pynman ha ka chnong Mowtyrshiah-B, kiwa kyrchaan yong oo da wan tooid ki da ki hajar ngut cha kani ka yalang kawa pynchong chit da kiwa rwai wa chaad ka chnong Mowtyrshiah-B, chnong Shilliangmyntang, chnong Mukroh, chnong Barato wa kiwi kiwi.
Ki paidbah na ki chnong waphær waphær da pynsniaw ki yei kyrmen wow jop emburom uni u kyrtong ka Party UDP kawa man leh ka Party ri-loom.
U Nujorki toh u khon u Mihsalan Suchiang uwa da man MDC la 20 snem wa 15 snem kam u MLA nachwa.
U EC Dkhar President ka UDP 4-Mowkaiaw Constituency da ong u wa u MLA warim nadooh wa rem u ym em de yohmyntoi ki chnong kani ka thaiñ wei heipor u Mihsalan da wan bait u man ka sngi chohthat waka sngi Bibar cha ka chnong wow yachem wa ki paidbah yow lait ki u hap wan da ki cha Shillong.
Chooh chooh da ong u wa i sniawsih wa ym em de u MLA wa kam uni wie da kytu joor u ya ki paidbah wym toh u chah pynbiej ha kiwa boon kam ha ka spah ka phaw yow lait u sihlet hadien.
Neiliang u Nujorki won da ong u wa dap u dei mynsien wa sniawngooh hawa yoo yeiwa tooid ki paidbah cha ka yalang yong oo wei kjut mynsien u leh u yoo oo wei ngait skem u leh wa u yoh ki uwa mihkhmat wa hok uwa ye u pynyoh ya waroh iwa angnood ki.
“Nga yaleh oo ya kani ka Election khlem em ka spah ka phaw wow thied ya phi. Tangwa em oo ka spah maya ya phi kawa ye u thied ya phi. Nga sniawthooh oo wa lada i thied i ya phi da ka spah da man ka hok yong phi kawa kaam ke, iwa mut ha ka chi minit ka hok yong phi waroh 5 snem da man ko kawa toh dor. Wei lada e phi ya ka jop u man oo u wow yeiñ neibynta yong phi hapoh ka dorbar chna aiñ ka jylla wei u wanrah yei kylla hapoh ka Constituency i wym pait chilliang.” da kular u Nujorki.
Kiwi de kiwi de klam toh u ki MDC warim u Newanly Lamare, u M Sayoo wa kiwi kiwi de.
Discussion about this post