Ka RITI Academy of Visual Arts ynne da pynman ko ya ka Crystal Gayle Award for Excellence ha Durbar Hall, Raj Bhavan, Shillong heiwa u Lat ka jylla, u Satya Pal Malik da man u kam u kongsan wei da e u ya ka Crystal Gayle Award-2021 cha u Wanhi-I Challam uwa man uwa chna dur (Animation) uwa na Chilliangraij, Jowai.
Ka Crystal Gayle Award pynkup burom ko ya kiwa em sap ha i pynyoo dur ya ki kaam namo ka Visual Arts and Practices wei da e ya ka ha i naam ka (L) Crystal Gayle Kharnaior, kawa da khlaad ha u snem 2017.
U Satya Pal Malik hawa e yei klam da ekhublei u ya ka Riti Academy of Visual Arts wa da kreh ko ha ini i bynta ha Meghalaya wei da kreh ko khlem sangeh ha i sap wa em ki bru kam ha i dro dur namo Painting, chna Film, i sap chongdur namo Photography wa kiwi kiwi.
Ya ka Riti Academy of Visual Arts da sdang hajrong ka thong wow pynchlur ya ki sap wa em ki bru wei wow tip u sñiawthooh ya ki kaam yong ki.
Da ong u leh wa nadooh u 1991 da sdang ya ka Riti Academy wei da kreh ha i bynta wow tipmit ya ki sap ki bru wei da pynchlur ko leh wow em i puræ ha kani ka bynta deiwa chim kabu ya ki laad yarap wa da e ka sorkar.
Kiwi kiwa da klam ha kani ka sngi toh u FR Kharkongor, Commissioner & Secretary, Arts and Culture Department, u Pravin Bakshi, Secretary u Lat ka Meghalaya, u Rapahel Warjri, Chief Art Director, RITI Academy of Visual Arts wa kiwi kiwi.
