15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1
Advertisement ad1

Da i yarap ki soo ngut kiwa ngam um na Khatar Shnong da ye u sai ya ki ar ngut kiwa rah ka um

0 Comments

Shillong: Hadien i thooh chitom wa khlem chong ngiah, hadien 5 sngi da yoh wow sai noh ya waroh ar tylli ki metyap na kawi ka thwai yong ka Wah Kyllang ha ka chnong Laitlyngkot.

Kam wow pynkynmoo wa ha ka 15 tarik uni u bnai, u Arthur Kyrmen Khongbuh da chah kit chah rah u haka um ha Wah Kyllang katwa dang lai thooh u ya u payu arbei yong oo uwa chah rah ha ka um ha Wah Kyllang, kawa em ha dong Nongthymmai-Lumthangding ka chnong Laitlyngkot.

Uni u payu arbei (uwa pyrtuid u Harry Khongbuh) uwa dang chong Class VI, ha ka 15 tarik (neidaw wa man ko ka sngi chuti Independence Day) da lai khwe dakha u cha kani ka wah deilang wa kiwi ki khynnah kiwa ha yung.

Manda poi ha luti cha kani ka wah iwa da rap jngai na chnong bru, syndet syndet u Harry da haap u na luti lai kjat hadooh wa poi cha um. Ka um wa khlan na i daw wa joor u slap ha kini ki sngi wa da dep da kit ko oo wut wei kiwa emlang wa oo da pyrchang ki wow thooh ya oo.

Hadien wa ym chem de ki oo da phet ki cha chnong wow pyntip ya iwa jia heipor kamwa 11 waje heiwa u payu arbei uwa tip kam u Arthur Kyrmen Khongbuh da phet u wut wut deilang ki marjan wa ki para chnong da lai ki cha katai ka wah yow thooh ya u Harry.

Tangwa da sihbhah won katwa dang pyrchang thooh ya uwa chah rah um, uni leh da oor u wei da kit ka um oo leh. Ini i jia da pynkhyrngiat ko yaka chnong waroh kawi.

Ynnin i step, ka um da sai chwa ko ya u Arthur cha sla um ha i por 8 waje i step. Katwa ya u Henry won da ye u sai hadooh wa jan dap chiteiñ sngi. Da yarap sai leh ya ki metyap da ki bru ngam um kiwa em i sap naka thaaiñ Khatar Shnong, Hima Sohra kiwa da wan yarap.

Nadooh ka sngi wa bood wa kini ki ar ngut kiwa chah rah ha ka um, ki bru na ka State Disaster Response Force (SDRF) wa ki bor pulit da hiar ki cha kani ka wah wow thooh nadooh ka thaw wa kini ki ar ngut da chah rah ki tangwa ym ye u leh chiboon neidaw wa khlaan palat ka um.

U rangbah shnong ka dong Nongthymmai-Lumthangding, u T Dkhar, da pynsñiaw u yei sñiaw ngooh ya ki 4 ngut ki nong Khatar Shnong kiwa da wan yarap wow thooh ya kini ki ar ngut, kamjooh ya ki paidbah chong chnong kiwa da wan wow thooh ya kiwa chah rah um, ki bor pulit na State Rescue Team wa SDRF, ya u rangbah shnong ka dong Laitmawroh, u Teling Buhphang, u BDO ka 12 Shnong Laitkroh C&RD Block, u Present Tynsong wa kiwi kiwi.

Hawa yohlaad uwa thoh khubor wow yaklam wa kini kiwa ngam um na Khatar Shnong, uwi na ki uwa tip kam u Tangait Khongshei naka chnong Mawsohmad, Khatar Shnong da ong u, “I wan i da ka sñiaw para bru wow yarap wei da ye wow sai ya kini ki ar ngut, wei da lai i boon tylli ki thaw wa jia kam ini i jia wow yarap wow thooh ya kiwa chah rah.”

Da pyntip u leh wa boonsien ha kam kini ki wah kam ka Wah Kyllang kawa ka um khlan bha ko wa ki thwai yullu bha ki, “I yarap para bru da ka sap wa e u Blai”, da ong u Tangait uwa da heh rta na kiwa ngam um.

Ya u Tangait Khongshei da wan yarap lang wa u Tarsan Khongshei na ka chnong Mawsohmad, u Ridenstar Mawpat na ka chnong Warbah wa u Mnian Khongsit (uwa ym emlang hawa yaklam wa uwa thoh khubor) na Thangtim, kiwa waroh na ka thaaiñ Khatar Shnong.

Previous
Next

0 Comments

Leave a Reply