U Narendra Modi ynne da e u ya ka chithi ha ka President ka ri wow ieh noh yei kaam kam u Prime Minister ka ri wei da antaad wa ye u wow baam smai hei sien wa le kam u Prime Minister ha kani ka 8 tarik.
Ynne hi da pynman leh ya ka yalang ka National Democratic Alliance (NDA) heipor janmiet ha i yung sah i u Modi ha nongbah New Delhi heiwa da jied biang ya u Modi wow man biang u kam u khlieh ka NDA.
Ynne hi kiwa yahkhmat ka NDA da yachem ki wa ka President ka ri ha Rashtrapati Bhavan heiwa da pynbna wa u Modi u yahkhmat biang u ya ka sorkar synrop NDA.
Kam wow kdaw heini ka BJP da jop ko 240 ngut ki MP wei deilang wa kiwi ki lok wa em hapoh ka NDA da em ki 293 ngut ki MP ha ka Lok Sabha kawa em 543 ngut ki MP.
Hapoh ka NDA da ya krehlang wa ka Telegu Desam Party (TDP) kawa em 16 ngut ki MP wa ka Janata Dal-United (JD-U) kawa em 12 ngut ki MP.
Ka BJP ha kani ka kynti da hiar i em MP ko heiwa ha u 2019 da jop ko 303 ngut wei dei bor yong ka samen leh da ye hi ko wow chna sorkar tangwa da krehlang hi wa kiwi ki Party hei pyrtuid ka NDA.
Yow chna sorkar da samen da emkaam wow jop 272 ngut ki MP heiwa ha uni snem da duna ka BJP da 32 ngut ki MP.
Discussion about this post