Ka Meghalaya Bharat Scouts & Guides West Jaintia Hills District kam chibynta wow pynkyrpang yei lehkmen lehburom dap 75 snem i yoh laitlooid ka ri India næ Independence Day, ha kani ka kynti dachim ko u pynman ka tayaw lehkmen lehburom watip kam ka 75th Independence Day Week Celebration 2021.
Ya kani ka tayaw lehkmen lehburom yong ka Meghalaya Bharat Scouts & Guides, West Jaintia Hills District ka wow sdang nadooh ka sngi Muchai 12 tarik Naisaphra 2021 wei ka wow kut ha ka sngi Khyllaw 16 tarik Naisaphra 2021 dawan wow wai pyrda ynne ka sngi da u W. Lyngdoh, Jt. State Secretary MBS&G, State Headquarter Shillong kam u kongsan hei emlang ka Saramai Tariang, District Commissioner, Guides West Jaiñtia Hills wa man kam ka chongknor yong ka yalang, u Ohiwot Laloo, District Secretary MBS&G West Jaiñtia Hills, u Adiam U Bthuh, Jt. District Secretary MBS&G West Jaintia Hills wa ki Scouts Master, Guides Captain.
Ha ka yalang watbian yong kani ka sngi da yoh ki kyntien yahkhmat heiyatoh wa ka thong yong kani ka tayaw lehkmen lehburom na u Adiam U Bthuh, Jt. District Secretary wa ki kyntien e mynsien heiyatoh wa ka sngi kyrpang yong ka ri India na ka Lamisakani Dkhar, Guide Captain, Lisse Pearls Secondary School, Mukhla wei hawa kut yong ka yalang u Elvis Dkhar, District Organiser Scouts, West Jaiñtia Hills da e u ki kyntien khublei.
Ki prokram kyrpang wada mang ha kani ka 75th Independence Day Week Celebration toh ka yakob thoh Essay chaphang u Mahatma Gandhi, ka yakob pynyoo miat riam næ Fancy Dress katkam ki riam ki bait u Mahatma Gandhi, ka yakob thoh Slogan heiyatoh wa ka Independence Day wa kiwi kiwi wei ya ki yakob waroh da pynman hei rukom yong ka Online heiwa ki khynnah Scouts-Guides hap ki wow yachimbynta na ki yung ki sem yong ki.
U W. Lyngdoh, Jt. State Secretary MBS&G, State Headquarter Shillong hawa klam ha kani ka sngi da yaroh u ya ki bor pynlai ka Meghalaya Bharat Scouts & Guides, West Jaintia Hills wei kani pynyoo ko wa hapyrdi i tynjooh yong kani ka khlam, ki khynnah Scouts-Guides hapoh ka District yohlaad ki u pynyoo pyntaw jiar ki sap ki phong yong ki.
Hawa kdar wan u wow klam chaphang i yoh laitlooid næ Freedom, ong u kam kiwa chong chnong næ ki dkhot ka Bharat Scouts & Guides Movement em i chiboon ki kaam wow leh neibynta i miat i bha ka imlang sahlang, kamtae ha kam ini i por khut kyrsu kyntu u ya ki bor pait bor pynlai ka District Association wow chimkhia ki u leh iyi lei yi heiyatoh wei puræ puthi neibhah ha kam ini i por em chiboon i ktah yei puræ puthi ki khynnah khamtam kiwa im ha ki thaaiñ nongkyndong.
