Ka HNLC da phah khubor ko ynne yow kitkhlieh yei emkti hei tympung Bomb IED ha Them Metor hei miet ka 9 tarik deiwa pynemkaam da ki Budnar Shadow Squad (BSS), kiwa man kam ki Special Forces ka HNLC kiwa da lai wow leh yeini i kaam.
Da ong ki leh wa hadooh ka sorkar MDA kamjooh ki pulit da khyrngiat ki yeini wa da ye u leh ha ini i thaw wa joor bha da kær kut da ki bor ka aiñ tangwa ym em won thmu ki wow pynmynsoo ya kiwon kiwon ki bru paidbah.
Da dawa ki leh wa da toh u sai lut ya waroh ki CRPF wa em ha Them Metor yow pyntikna wa yoh ki jaitbru Ynñiawtrep wow lai u wan ha kani ka thaw deiwa laitlooid.
Da khana wa da leh ki yeini neidaw wym ye ka sorkar wow kyrriah ya kini ki Harijan wa sah ha ini i thaw, kamtæ ym yohsa wow pynyoo dei kaam chipai yow pynkynmoo yaka sorkar wym ye ko wow yada ya ki Ynñiawtrep neibhah ym kwah wow yoo da ka thma. Ya kawon kawon ka jaitbru wa booh ya ki Ynñiawtrep hei maa daw hap wow leh deiwa eh wei ka sorkar hap ko wow kyrriah ya kini ki bru hapoh chi bnai lym kamtæ ka sorkar daw maad ko da ki kaam wa khor.
Da ong leh wa ki pulit toh kiwa da yaleh thma pyrchah ya ki jaitbru yong i wei daw yada ya ki bru yong i la kammon kammon leh wei u yaleh ki neibynta ka jaitbru neibhah ki kam ka dkhot ka seiñ ym dooh nong ki iyi iyi leh.
Chooh chooh da ong wa ka Home Department ka jylla toh kawa da pynlai da ki Dkhar wei ki pulit Khasi da pynman kam ki ksaw kdong mrad. Manda ong ya ki chang da chang ki, manda ong dait, dait wot ki, manda ong pynkhih tdong pynkhih wot ki, manda ong mih snaam mih wot ki neibynta ki Dkhar. Tangwa yow yada ya ki Ynñiawtrep na i kti ki Dkhar næ na ki pulit Dkhar ym em lamieñ ym em snaam ki wow e.
Da ong u leh wa u Prestone Tynsong wa u Sniawbhalang Dhar toh kiwa chah pynemkaam ha kiwa yahkhmat ki Garo kam u Mukul Sangma wa u Conrad K. Sangma yow yoh bor synhcaar khadar, nyngkong hapoh ka Congress wei katni won hapoh ka NPP. Da man ki kam ki kada wa kit blaithaw hei parom u Aesop. Kamtæ da pynkynmoo ya ki wa ki ymtoh ki bru wa chemphang wa stat kiwa ye u pyrkhat ya idæ.
Da pdiang ki leh yeiwa da em ki Harijan da slem hapoh ki thaw yong u Ynñiawtrep wei ym em beh ya ki napoh ka Bri U Ynñiawtrep tangwa toh u lai sah ki chei thaw wa da dep booh da ka sorkar ya ki wei wow mih deiwa suk napoh ka Them Metor. Da khana leh nachwa da pynyap ya u Lal Singh na ki kaam pyrcha aiñ u iwa da ktah yei sñiaw ka jaitbru yong i.
Kamtæ da ong wa ini i toh ka khubor wa che bha ya waroh ki Dkhar wa em hapoh ka Bri U Ynñiawtrep wa pdiang hi yeiwa em phi tangwa ymtoh u kam yei thaw yong i, u pynyoo bor, u pynkhor i, u tynjooh i wei lada leh kamni daw maad deiwa khor neibhah uwa tooh ym ye u wow man kam u tre.
Ka kyrwoh na u Saiñkupar Nongtraw, General Secretary cum Publicity Secretary, HNLC.
Discussion about this post