Ka Dorbar Chnong Tympang-Iawmusiang, Jowai ryngkat ka Tympang Club, Jowai da rai ki wa ha kani ka kynti wow pynman da ka Common Platform ya ki kyrtong ki wow yaleh ya ka General Election cha ka 2-Jowai L.A. Constituency wei da pynbait wow pynman ya ka rynsan wow emlang waroh ki kyrtong namo ka Common Platform ha ka 16-02-2023 heipor 7:00 waje i miet ha Tympang Club Hall.
Da chim ya kani ka rai hadien wa da dep chong pyrkhat sani bha khnang wa ym ktah palat yei por kiwa chong chnong khamtam kam kiwa chong ha kani ka thaw kawa em hapyrdi ka sor Jowai wei kwah ki wow pynemburom ya ka rukom synchaar paidbah (Celebration of Democracy) deiwa yoh yei che nei yatai, nei yaklam ki kyrtong/Party ha kawi don ka rynsan kawa daw man i myntoi ya kiwa chong chnong.
Kamtæ da pynbait wei da chim ya ka rai kawa bha wow pynman da ka Common Platform wei yow ye u pyndep ha ka chi sngi, chi miet ya ini i kaam.
Neiliang ka Dorbar Chnong ryngkat ka Tympang Club da booh ki leh ya kini ki kyndon wa man kamni:
U e laad 30 minit samen ya ki kyrtong/Party wow klam pynche ya ki yurim wa yieñ yaleh ki ha kani ka Election wei kamjooh leh hadien wa da dep lut waroh, daw e won sa 5 minit wow klam pynkut.
Daw pynkhle nasib chwa wei kiwa klam hap ki wow klam katkam wa yoh ki.
U chah du 10 ngut ki wow synraan ya u kyrtong ha kani ka Common Platform.
U chah du 3 tylli ki kari ki wow wan lang wa ki kyrtong ha kani ka miet wei ya kiwi ki kari yong kiwa kyrchaan ki kyrtong daw hap wow booh cha baar u pood ka chnong.
Ym chah ya kiwa muaid tanglang wow psiah chapoh ka Hall ha katai ka miet.
Neiliang ka chnong daw khut ko ya ki kattu katni na ki seiñ kreh monsñiawbha wow wan sakhi ya kani ka Common Platform.
Neibynta i lut i sep waroh neibynta kani ka Common Platform daw pynlut na ka poisa ka chnong wa ka Club.
