Ka Jaiñtia Coordination Committee for Reservation Policy (JCCRP) kawa kynthup ya ka JYF, JSU, JSM, SWCRJ ynne ka sngi 18 tarik da chong yalang ko ha yung krehkaam ka JYF.
Hawa yaklam wa kiwa pathai khubor, u Chairman ka seiñ uwa man leh u President ka JSU u Jersom Shylla wa u Secretary, u Sambormi Lyngdoh uwa uwa man leh u President ka JNC, da khut ki ya waroh kiwa chong chnong ka Ri-loom Jaiñtia wow wan cha ka yalang paidbah ka wow man ha ka 9 tarik u Naikhynde, 2023 heiwa yei thaw daw pynbna hadien wow yaklam hajrong ka Reservation Policy.
Neiliang ka JCCRP da kyrpaad ko ya waroh ki khynnah skur, khynnah College, ki khynroo khyllood, ki khroo pyrkhat wa kiwi kiwi wow wan cha kani ka yalang.
Da ong wa da pynman ya ki yakhih wa har rukom ha kylleiñ ki thaw heiyatoh wa ka Reservation Policy heiwa da e khublei ya ka sorkar kawa da rai wow pyndooh ya ka kyndon wa ong wa ka bhah ki Garo wym ye u pyndap ye ki Garo kiwa na baar jylla wow pyndap.
Chooh chooh da ong ko wa ka sorkar da kular ko leh wow chna ya ka Expert Committee heiyatoh wow pynkylla ya ka Reservation Policy kawa da rim bha, kamtæ da chim ya ka rai wow pynman ya ka dorbar bah ha Jowai ha ka 9 tarik.
Neiliang u Secretary ka JCCRP da kyntu joor u ya ki paidbah wow mih yonglang cha kani ka dorbar bah ha kam ini i por wa ka sorkar da rai ko wow pynkylla noh ya ka Reservation Policy wei emkaam wow chim kabu ya kani ka laad yow pynkylla noh ya kani ka Reservation Policy kawa noh chiliang khnang wow im ka jaitbru.
Discussion about this post