Ynne ka sngi u kyrtong ka BJP na Raliang Constituency, u Lakhon Biam da lai thap pyrtuid wow yakhun ya kani ka Election MLA 2023.
Hadien wa thap pyrtuid hawa yaklam ya kiwa pathai khubor, da sñiawngooh u ya kiwa kyrchaan yong oo ha u snem 2018 heiwa da yoh u 8879 tylli ki Vote wei ym em u sñiawpher u ya kiwi kiwa ym em kyrchaan ya oo.
Heiyatoh wa kani ka kynti da ong u wa ha ki 7-8 bnai da lai psiah u awjan hadooh 90% ki manyung ka Constituency wei kat cha kiwa lai u da ong ki wow kyrchaan bait ki oo ha uni u snem wei da tikna u wow jop bait.
Heiyatoh wa ki kreh wa thmu u, da ong u wa hapoh ka Raliang Constituency em chiboon ki duna la ha ki sarok kiwa da sih bha, lada hei chait i khiah heiwa boon ki PHC kiwa da toh wow pynku kyrdan, ki skur leh dang duna wei da kular u leh wow wanrah ya ka Engineering College wow chna ha Thadmuthlong neibhah da em i tyrwa kam itæ dang ha ki snem nachwa tangwa dang sahteiñ hajrong wa da e ya i thaw cha ka sorkar.
Da ong u leh wa ki khynroo katni da dooh mynsien bha ki ya ka DSC waka MPSC wei neiliang yong oo kwah u wow pynkylla noh yei rukom krehkaam yong ki neibhah hadien 4-5 snem u khut Interview ki, heiwa neiliang yong oo kwah u wa ka DSC wa ka MPSC u khut ya ki Advertisement wa i thung kreh man-u-snem wei wow pyndooh ya ki Personal Interview khamtam ya ki Grade III wa Grade II heiwa u em du ka Written Exam donhi.
