Ka Niaw Wasa Youth Federation (NWYF) da lai booh ko da ka ujor hakhmat u Superintendent of Police ka East Jaiñtia Hills pyrchah ya ki bru ki wym tipmit kiwa da khut ya idæ kam ki High level. Kini ki bru kiwa kam ya idæ kam ki High Level toh kiwa emkti wow chalan tooh ya u mooyong, u kwai supari wa kiwi kiwi de ki mar pyrchah ya ka aiñ kiwa da chalan khlem kiwon kiwon ki kot ki sla wa biang.
Neiliang ka NWYF lyngba u President u Pynbiang Rymbai da ong u wa da jooh sñiaw wei da yoo yei lai laitlan ki kari kit mar kiwa chalan pyrchah ya ka aiñ kiwa lai cha kiwi won ki jylla lyngba ka jylla yong i kawa pynemkaam da kitai ki bru kiwa kam ya idæ kam ki High Level kiwa da e bor wow lai namo Entry ya ki kari yong ki ha i dor wa heh khnang yow lait ki nei chah pynsangeh.
Neiliang u Pynbiang Rymbai da kylli chooh chooh u wa kini ki High Level em næ ym emyatoh ki wa ki heh sorkar lane wa kiwa mihkhmat paidbah iwa da pynsñiawkhia joor wa em kam kani ka High Level.
Ka seiñ hawa yaklam wa u DSP ka East Jaiñtia da booh ko leh yei kyrpaad wow booh daka takit wa khooid khnang wa ki paidbah ka Bri u Ynñiawtrep u tip dur ki ya kini ki bru wa em hapoh ka High Level wei kiyi de kiwa emkti wow seiñ ya ka.
U Pynbiang Rymbai da pynkut u deiwa ong wa lada toh ki High næ ki Low Level, ka aiñ toh u man ko i jooh wei ya kiwa tyngkheiñ ya ka aiñ toh u pynchitom katkam ki kyndon ka aiñ.