Ka Russian Direct Investment Fund (RDIF) da pyntip ko wa ka Drug Controller General of India (DCGI) da chah ko wow pynemkaam ya i dawai yada COVID-19 wa pynmih ka Russia, i Sputnik V Vaccine.
Lyngba ini, ka India da man ko ka ri kawa 60 wow chah u pynemkaam ya ini i dawai tika ka Russia i Sputnik V wei chirup wa ini hapoh India da chah wow pynemkaam 3 tylli ki dawai kiwa kynthup ya i Covishield wa i Covaxin.
Ya ini i dawai Sputnik V da Register hapoh India wei da chah wow pynemkaam hapoh ka Emergency Use Authorization hadien wa dadep leh ya ki Clinical Trial ha Russia wei katni hapoh ka Phase III yong ki Clinical Trial ha India chirup i yakrehlang wa ka Dr. Reddy’s Laboratories.
Da chah wow pynemkaam ya i Sputnik V ha kiwi ki ri kiwa kynthup ya ka Russia, Belarus, Argentina, Bolivia, Serbia, Algeria, Palestine, Venezuela, Paraguay, Turkmenistan, Hungary, UAE, Iran, Republic of Guinea, Tunisia, Armenia, Mexico, Nicaragua, Republika Srpska (Entity of Bosnia and Herzegovina), Lebanon, Myanmar, Pakistan, Mongolia, Bahrain, Montenegro, Saint Vincent and the Grenadines, Kazakhstan, Uzbekistan, Gabon, San-Marino, Ghana, Syria, Kyrgyzstan, Guyana, Egypt, Honduras, Guatemala, Moldova, Slovakia, Angola, Republic of the Congo, Djibouti, Sri Lanka, Laos, Iraq, North Macedonia, Kenya, Morocco, Jordan, Namibia, Azerbaijan, Philippines, Cameroon, Seychelles, Mauritius, Vietnam, Antigua and Barbuda, Mali wa Panama.
Neiliang u Kirill Dmitriev, CEO ka Russian Direct Investment Fund da ekhublei u ya i rai ka DCGI wow chah u pynemkaam ya ini i dawai hapoh India.
Da ong u wa ka India man ko ka thaw wa khlan bha wow pynmih ya ki dawai wei daw pynmih leh ya ini i i dawai Sputnik V hapoh ka ri i wow pyndap yei emkaam dawai hapoh India wa kylleiñ ka pyrthai.
Chooh chooh da pyntip u wa hadooh 850 million dose i Sputnik V daw pynmih hapoh India man-u-snem.