Ki pulit ka East Jaiñtia Hills wa kynthup ya ka ANTF wa ki pulit ka Khliehriat Police Station ha ka 30 tarik u Naikhynde da chem syndon ki da ka karkhana kawa chna yei dawai Phensedyl wei da kem leh leh ya ki 3 ngut kiwa da emkti ha ini i kaam.
Ini i dawai Phensedyl toh iwa da thmu wow lai chalan tooh cha Bangladesh wei da yoh wow kem 9883 tylli kini ki klong na kawi ka kudam.
Katkam wa pyntip ki pulit hadien wa da tip bniah, da yoh wow kem ya u Altaf Hussain uwa dang yoh ya kini ki mar kiwa da murieh u ha ka kudam yong oo.
U Altaf Hussain da yah u ya ki pulit cha u bru uwa man u heh wow leh ya ini i kaam uwa tip kam u Ratan Dkhar, uwa chong chnong ha Ummulong wei da kem leh ya oo. Uni toh uwa em ya ka karkhana khian wa pynkrehkaam u pyn ha yung yong oo hi wow chna ya ini i dawai Phensedyl yow lai dai cha Bangladesh.
U Ratan Dkhar toh uwa em arngut kiwa krehlang u kiwa na Assam deilang wa u Hussian wei sa uwi uwa tip kam u Shaheen uwa yarap kit ya kini ki mar wei ya uni leh da kem ya oo.
Ki pulit da yoh ki leh wow kem ya 600 klong i dawai Elcodyl Cough Syrup iwa mar 100ml iwi, 10 tylli ki klong wow pynbang (Flavouring Agent) kiwa mar 500ml iwi, 10 Kg i Diphenhydramine Hydrochloride iwa emkaam yow chna Phensedyl, 1 Kg i Chlorphenirame Maleato (iwa pynemkaam yow chna Phensedyl).
Da yoh leh wow kem ya 7 tylli ki kot wa khana kammon wow chna dawai, ka kor wow thap dawai hapoh klong wa kiwi kiwi de kiwa emkaam yow chna dawai.
Discussion about this post