U Speaker warim ka Meghalaya Legislative Assembly uwa man leh kam u President ka UDP, u Metbah Lyngdoh daw man noh u kam u Chairman wa thymme ka Meghalaya State Planning Board (MSPB) wei yeini da pyntikna da u Montri Rangbah ka jylla, u Conrad Sangma.
Da khana u leh wa ka sorkar daw pynmih ko yei pynbna heiyatoh wa ini myntu ka sngi.
Heiyatoh wa ki MLA ka UDP ki wym em u yoh u man kam ki Montri sorkar, u Conrad da ong u wa ka UDP ym em pyntip ko wa lada daw em i yabhah lang ya ka chuki tangwa ka BJP waka HSPDP da dep ki wow pyntip wa ya ka chuki daw ksoh da ki MLA yong ki mar ar snem chiteiñ.
Heiyatoh won wa lada dang em ki MLA ka NPP wa kwah wow man Montri sorkar da ong u toh hi wa ka NPP em ko boon ki MLA kiwa na Garo wei daw pyrkhat won hadien tangwa kamwa man katni da dep wow rai wa 4 ngut toh u man Montri na Garo katwa 8 ngut won na Khasi wa Jaiñtia Hills wei da yaleh u wow pynkhun neibhah waroh ka thaaiñ kwah ki wow em ya uwa mihkhmat.
Da ong u wa iwa emkaam toh wow kreh neibynta waroh kawi ka jylla wei ini toh u em i hakhmat dooh wow lai chakhmat.
