U Montri ka chnat Sports and Youths Affair ka sorkar jylla, u Wailadmiki Shylla, ynne ka sngi hawa wan chimbynta kam u symbood kongsan ha i sdang lehkmen dap 25 snem ka Jowai Polytechnic wa da emlang leh u Montri ka chnat pure puthi, u Lahkmen Rymbui kam u kongsan, da wai haroh u ya u mooyurim neibynta u chna ya ka madan Synthetic Futsal wa ya ka madan Basketball Court kiwa da mang u chna hei lut wa Rs. 2 klur tam.
Da emlang leh ha kani ka sngi u Manhiam Marbaniang, Chief Engineer State Sports Council, u Deputy Commissioner ka West Jaiñtia Hills, u Abhinav Kumar Singh, u Principal ka Jowai Polytechnic, u Strong Pillar Basaiawmoit, ki Principal na ki thaw puræ waphær kiwa chah khut sñiawbha wa kiwi najrong kiwa jooh puræ warim ka Polytechnic.
Hawa klam ha kani ka sngi, u Wailadmiki da yaroh u yei lai luti kani ka chlem puræ puthi nadooh kiwa sikai, ki khynroo khyllod wa puræ.
Ong u wa mar ya tip u wym em thaw yalehke Sports ka Polytechnic da wan u wow pait sylli wei pynyoh leh ya ka mang poisa neibynta u chna, neibhah sñiawthooh u wa najrong i puræ puthi emkaam leh u pynku yei sap yalehke Sports.
Heijooh i por i yalehke Sports man ko leh kawa yarap yei chait hei bor pyrkhat wei i doh i pran.
Chooh chooh ong u hapoh i yahkhmat kani ka sorkar chiboon da ye u leh wei yooluti u wa neini chakhmat daw ye u leh choo yeiwa emkaam, heiwa da kyntu u leh yei yakrehlang chirup wei ka Tender yow chna ya kini ki madan dadep khut wei sah sa u sdang kreh.
Heijooh i por kyrpaad u leh ya u Montri ka chnat puræ puthi u Lahkmen Rymbui wow sñiawbha pynbiang u ya kiwi won kiwa emkam kani ka chlem heiyatoh i puræ puthi.
Discussion about this post