Ka North East Zone Cultural Centre (NEZCC), Dimapur kawa man kam kawi na ki chnat krehkaam yong ka Ministry of Culture ka sorkar India deiwa ya krehlang wa ka chnat Arts and Culture ka jylla Meghalaya, ynnin i janmiet da pynman ki ya ka yalang da ki rwai wa i chaad tynre kam chibynta i leh burom ya u bru chlur wa yaleh laitlooid ka ri, U Tirot Sing Syiem ha ka lehkmen ka ri India ya ka Azadi Ka Amrit Mahotsav kam chibynta i lehkmen yei dap 75 snem i yoh laitlooid ka ri.
Ya kani ka lehkmen da pynman ha Khasi Patriotic Home, Nongkhlaw wei da wan sakhi da u Lamphang ka Yung Dorbar Chna Aiñ ka jylla, u Metbah Lyngdoh uwa da wan kam u kongsan hei emlang u Syiem ka Hima Nongkhlaw, u Pa’iem P.M. Syiemlieh, u Additional Deputy Commissioner ka Eastern West Khasi Hills District, u A. Nongbri, u Superintendent of Police ka District, u M.B. Syiem, ka Assistant Director ka Directorate of Arts and Culture, ka D. Kharjana, u Syiem Khynnah ka Hima Nongkhlaw, u K.M. Syiemlieh, ki dkhot ka kur Syiemlieh, u Sordar ka chnong Nongkhlaw, u Clement Dkhar, ki khynnah skur wa ki paidbah wa chong chnong ka chnong Nongkhlaw.
Hawa e yei klam kam u kongsan, u Metbah Lyngdoh da ong u wa i lehkmen ya iwa khroo u Tirot Sing Syiem lyngba ka Azadi Ka Amrit Mahotsav da pynkynmoo ya ki paidbah wa chong chnong yei mynsien wa chlur wa i wym eli yong kiwa yaleh laitlooid ka ri wei ini da pynyoh leh ya ka laad ka kabu neibynta ki paidbah wa chong chnong wow pyrkhat hajrong iyi wa ki ye ki wow e wow noh kam chibynta wow pynku ya i bha i miat yong ka imlang sahlang lyngba ki sap ki tap wa u Blai da e u ha ki.
Ha kani ka sngi, u Metbah da khut da wer u leh ya ki paidbah kiwa da sakhi lang ya kani ka yalang wow pyrkhat ya i rukom im u Tirot Sing Syiem uwa da yakhun dohyap pyrchah ya ki bor ka sorkar pharæng wow pynneh pynsah ya ka dustur riti wa ka sap kyrpang yong ka ri-loom Khasi.
Da pynphooh pynphieñ ya kani ka yalang da ki rwai tynre i chaad tynre wei da leh ya ka Skit hajrong u Tirot Sing Syiem da ki bru wa em sap ka District wa kamjooh kiwi de kiwa da wan na nongbah Shillong.
Kiwi kiwi de kiwa da klam ha kani ka yalang kynthup ki ya u Syiem ka Hima Nongkhlaw, u Pa’iem P.M. Syiemlieh wa ka Assistant Director ka Directorate of Arts & Culture, ka D. Kharjana.
