Jowai: Ka Jaiñtia Students’ Union – Central Body da pynsñiaw ko yei mynsien wa chrai hajrong i kyrriah syndet ya ka yung krehkaam ka PWD Jowai North Division na Jowai cha Shangpung, West Jaiñtia Hills, da ong ka khubor na u President ka seiñ u Lawyerson War.
Chooh chooh da ong ka seiñ wa kamwa da tip che wa ka Sub-Division yong ka PWD North Division da em chwa ko ha Shangpung, neiyi i daw won wa kwah u kyrriah sa ya ka yung krehkaam u Executive Engineer kani ka chnat cha i thaw wa em kani ka Sub-Division, wei ini man i iwa ymye mutdur yei thmu ki kattu katni ki wow yoh myntoi samen donhi.
Chooh chooh da ong ko wa man i iwa miat lada kani ka yung krehkaam neh ko ha Jowai kawa man ka thaw wa pyrdi kamwa man ko katni khnang wow suk ki paidbah neibhah wa em ko ha ka Headquarter ka District hawa em ki kaam wa jhan.
Da pynkynmoo ko leh wa u MLA yong ka 3 Raliang Constituency u C Ymbon ha ka por Election da kular u wa lada dang poi u cha ka thong daw wanrah ya ka Engineering College ha ka chnong Shangpung tæ boi neidaw wymye u wow leh yeini da rah pathan da ma yung krehkaam ka PWD heithaw kani ka College.
Heijooh i por da pyntip ko wa da pynkhreh ko wow ujor da ka PIL (Public Interest Legitation) hajrong kani ka kaam wow kyrriah hi-eh ya kani ka yung krehkaam na Jowai cha Shangpung.
Discussion about this post