Ynne ka sngi ki paidbah ka Iooksi Pyllun da ya mih paidbah ki wow pynyoo i kyrchaan ya u Nehemayah Tyngkan u khon yong ka chnong uwa da rai wow yakhun biang yaka Election MLA na 4-Mowkaiaw Constituency naka Party Congress ha ka yalang wada pynman daka San Shnong Iooksi Pyllun.
Ha kani ka yalang najrong wa ki paidbah pynyoo ki i kyrchaan ya oo, da ya noh kyllooid mynsien haroh ki daka poisa hapoh ki borti kam i dak pyn-ehbok pyn-ehnasib yei lai luti yong oo chakhmat heiyatoh wa kani ka kaam.
Heijooh i por wot ka seiñ manbei leh da e kti ko ya ka song poisa yarap ha oo.
Neiliang u Nehemayah hawa klam da pynsñiaw u i sñiawngooh ya waroh ki paaid ka 4-Mowkaiaw, wei kyrpaad u leh wow kyrchaan ki ya oo dei maya khnang wa oo leh hadien i jop u chakri u ya ki dei maya.
Khana u wa hachwa wow chim u ka rai u yakhun biang, da dep thooh bniah u kylleiñ ki chnong wei chem u boon kiwa bru da wan ki chakhmat u e kyrchan ya oo.
Da kdaw u leh yei chah lehbeiñ ka thaaiñ wa em ki Scheme pynroi wa toh hok u yoh leh da chah rah, neitæ i chah yoobeiñ kam hei liang ka Health Center wa kiwi kiwi.
Ong u leh wa kani ka sorkar toh kawa synchaar embor wa emktilang ka NPP, UDP waka BJP heiwa ya kiwa dooh u nangpyndooh katwa ya kiwa yoh u nang pynyoh, wei daw poi i por wot yow mar wa rep leh daw em da kitæ ki High Level.
“Ye u ong ki bru lada jop u Nehemayah yi krum u neibhah ki MLA Congress da yut ki, tangwa la yut ki MLA leh kiwa thap Vote ym em yut ki, wei ka Party Congress toh du ka donhi kawa sñiawthooh yei eh u paidbah,” da ong u Nehemayah.
Pyntip chwa haroh u wa daw wiar u na chnong ha kini ki sngi neidaw wa hap lai hiar u kut ki chnong ka 4-Mowkaiaw, kamtæ kyntu u ya ki paidbah wym hoi u sorsa ki neibhah wa ha kitai ki sngi oo dang dooh thiah dooh dem u wow li thooh moolangnai yow tyrchaaiñ ka chnong ka thaaiñ.
Neitæ u Wanpoi Lyngdoh, u Rikut Pareiñ, u Nangai Sutnga, u Justice Paul Lyngdoh, u Kheiñkor Phajoy, u Iul Sungoh, u Complain Tangliang wa kiwi kiwi kiwa klam da kyntu ki ya ki paidbah wow man kiwa sian wym wow chah pynbiej haka poisa neibhah ha ka sorkar wa katni da chah kdoh cha khoom ki paidbah ha kiwa boon ki liang.
Pyntikna ki leh wa katkam i lai luti, i jop ha u 2023 u lai ko cha u Nehemayah Tyngkan neibhah wada yoo chynna ki yei kyrchaan ki paidbah na kylleiñ, khamtam i kyrchaan wa yoh u naka chnong Iooksi.
Heijooh i por da beiñ ki leh yei wan hiar u Conrad ini wa dep ha Raliang deiwa ong wa du neibynta u e Scheme khon sniang da chna yaka Pandal kawa da ki phaw lak kawa man ka buit pynbiej donhi.
Da pynchongchit chooh chooh ya kani ka sngi dei chaad i rwai naki manbei, ki khynroo khyllood ka Iooksi.
