Da ka ram wa $132.8 Million pynyoh ka India yaka Meghalaya yow pynkhlan ya i rukom saam bordiñ

Ka Asian Development Bank (ADB) wa ka sorkar India ynne da soi ki ya ka soskular wa $132.8 Million kam ka ram wow pynkhlan wei wow pynthynme yei rukom saam bordiñ hapoh ka jylla Meghalaya.

Ya kani ka soskular da soi neibynta ka Meghalaya Power Distribution Sector Improvement Project da u Dr. C.S. Mohapatra, Additional Secretary (Fund Bank & ADB), Department of Economic Affairs hapoh ka Ministry of Finance neibynta ka sorkar India wa u Mr. Takeo Konishi, Country Director ka ADB’s India Resident Mission.

Hadien wa soi ya kani ka soskular neibynta kani ka ram, u Dr. Mohapatra da ong u wa kani ka Project daw yarap ko ya i thong krehkaam ka sorkar jylla wa tip kam ka “24×7 Power for All” wow yarap ya ka jylla ha ki kaam wa yatoh wa ka bordiñ.

“I rukom pynmiat ya i rukom saam bordiñ katkam ka juk wa katni wei deiwa kreh katkam wa yah wa man i suiñ bneiñ, i wanrah ya ki Smart Meter, ki Online Meter Reading, i rukom kheiñ bai bordiñ, wa i rukom su bai bordiñ daw yarap bha i ya ka jylla,” da ong u Konishi.

Related posts

La du Rs. 1 chi churia yoh ka JHADC na ki Cement Factory da ye u su tulop kiwa kreh: Daiapherbha Lamare

December 26, 2024

Kwah u George wow psiah biang cha ka Congress yow yakhun MDC

December 23, 2024

Hanlada ka Meghalaya da ye ko u pynpoi bordiñ cha waroh tangwa ki thaw wa man palatsor dang chem chitom ki nei slah thut ka bordiñ wa kiwi kiwi iwa wanrah yei doohnong wa khroo katwa kamtæ ka sorkar pyrdi chirup wa ka sorkar jylla da sdang noh ki ya kani ka 24×7 Power for All Meghalaya wow pynpoi bordiñ kawa ym thut, kawa toh dor cha ki paidbah.

Hapoh kani ka Project daw chna hadooh 23 tylli ki Substation; chna pynthymme ya ki 45 tylli ki Substation, u chna wei wow kylliang hadooh 2,214 Km ki Distribution Line wa kiwi kiwi.

Daw sdang pynemkaam noh leh ya ki Smart Meter ki wow myntoi ki 180,000 tylli ki manyung.

Ya kani ka ram daw kyrchaan (Supplemented) leh da ka $2 Million na ka ADB’s Japan Fund for Poverty Reduction neibynta ki Renewable Energy Mini-grids wow pynpoi bordiñ cha ki thaw seiñ khih, khamtam neibynta ki kynthai wa ki chnong ki skur.

Kani ka Project daw yarap ko leh chiboon ya ka Meghalaya Power Distribution Corporation Limited (MePDCL).

Ka ADB toh kawa da sdang nadooh u 1966 wei kiwa embynta ha ka toh ki 68 tylli ki ri hajrong ka thong wow pynmiat ya i rukom im ki bru ha ki ri wa em ha Asia wa Pacific khamtam wow pynwiar ya i dooh i duk.