Hadien wa pynmih ya i rwai State Anthem ha ka 21 Duyatra uni u snem kam chibynta i lehkmen dap 52 snem ka jylla Meghalaya, da mih i pyrchah iwa boon neidaw wym em u pynmih ya i ktien Jaiñtia ha ini i sur.
Ynne ka sngi won ha ka Dorbar Mang Tangka ka JHADC, u CEM ka Council, u Thombor Shiwat da wanrah u ya ka Resolution wow kyntu ya ka sorkar wow kynthup ya i ktien Jaiñtia ha ini i sur.
U Thombor da ong u wa man iwa sñiawkhia wei khyrngiat hadien wa yoo wym em u mih i ktien Jaiñtia ha ini i sur heiwa da em du i ktien Khasi, Garo wa English.
Da ong u wa ha Meghalaya em le tylli ki jaitbru ki Khasi, Jaiñtia wa ki Garo wei i wym kynthup ya i ktien Jaiñtia pynsñiaw chah mylliñ wei chah ieh ki Jaiñtia kiwa em jar ka parom wa i rukom im kamjooh i synchaar.
Kamtæ da rai wow kyntu ya ka sorkar jylla wow kynthup ya i ktien “Jaintia” ha ini i sur neibhah lada ym kynthup daw man kamwa chah ieh khonswet ki.
Da rai leh wow thoh cha u Lat ka jylla, u Montri ka District Council Affairs wa u Commissioner and Secretary ka District Council Affairs Department.
Hawa yaklam hajrong ini, neiliang u Andrew Shullai da ong u wa man iwa sñiawsuk wa rah ya ini i kaam, wei sñiawsih leh wa em ki bru chim kabu wa kwah wow pynwiar ya ki Pnar na ini i sur.
Da ong u wa ka sorkar tipmit ko du ya i ktien Garo wa Khasi wei ka Council da pdiang ko ya ki dak thoh Jaiñtia kamtæ emkaam ya ka Executive Committee wow paan na ka dhab ki Montri wow tipmit noh ya i ktien Jaiñtia.
Neiliang u Brightstar Chyrmang da ong u wa ini i wym mih i ktien Jaiñtia ha ini i sur pynyoo wa da chah mylliñ i hanlada em i ya ka District Council.
U Krison Langstang da ong u wa ini i sur ympu man pura i kat wympu em i ktien Jaiñtia.
Neiliang u Thombor da pyntip u ha ka yung wa katkam wa man ki dak thoh da phah cha ka sorkar wei katni dang sah i hapoh ka Law Department donhi.
Discussion about this post