Kat dang mih ki sngi i poor ka khlam COVID-19 dang pteiñ ko wei hajrong ki laad wow yada wa da pynmih da ka sorkar lyngba ka chnat i chait i khiah, iwi na ki laad wa da pynchlur bha ya ki bru toh wow chim ya i tika yada COVID-19.
Ynne ka sngi neiliang u MLA ka Jowai, u Wailadmiki Shylla da kyrpaad u ya ki bru wow wan chaphrang khlem em i tieñ wow chim ya ka tika yada na uni u khñiang khlam COVID-19 khnang wow ye u pynduna ya i poor wei wow pyndooh jait ya uni u khñiang.
Da ong u wa neiliang yong oo chirup wa ki bor District wa ki Doctor na ka chnat i chait i khiah da chong pyrkhat ki kammon u pynkhlan ya i e tika heiwa da rai wow leh ya ka Extensive Vaccination Programme hapoh ka District heiwa da rai wow booh hadooh 64 tylli ki thaw e tika namo ki Vaccination Centre ya ka wow sdang nadooh ynne ka 21 tarik Naiynru.
U Wailadmiki da kyrpaad u ya ki paidbah wow wan chaphrang deiwa khut lut ya waroh, deilang wa ki lok ki jor wow chim ya ini i tika deiwa kyrpaad leh wa ymtoh u man ki bru kiwa chah yalam bakla neibhah wa kamwa man katni ha India da em kamwa 28 klur kiwa da chim tika wei oo leh man u uwi na kiwa da chim ya ini i tika khlem em iwon iwon i chah ktah.
Heijooh i por u Wailadmiki da pyntip u wa neiliang yong oo kam ka dak wow pynchlur wei wow e mynsien ya ki bru wow chim tika ki nadooh ynne ka 21 tarik hadooh wa kut uni u bnai, da pynkhreh u wow e yarap cha ki 10 tylli ki manyung (kiwa wan chim tika) ha i dur ka Scholarship kawa T. 5,000 ya uwon uwon næ kawon kawon ka khon (uwi/kawi) neibynta i puræ puthi yong ki.
Da ong u leh wa ya kini ki 10 ngut wow jied ya ki daw pynman dei pynkhle nasib wei kini kiwa yoh toh du ya kiwa na ka Jowai Constituency heiwa lada uwa chah jied toh u pa, ka bei, u ma næ kiwon kiwon ye ki wow tyrwa ya ka Scholarship cha uwi/kawi na ki dkhot ka yung kiwa dang lai skur wow yoh myntoi ya kani ka Scholarship.
Chooh chooh da pyntip u wa ya ka yutip wa bniah kiwon ki thaw e tika kam ki Sub Centre, PHC, CHC, UPHC wa ki tarik wa e tika ye u yoh na ka Facebook wa Instagram account u Wailadmiki Shylla.
Da kyrkmen skem u leh wa ki paidbah u mih ki chaphrang khnang wow ye u imsuk im saiñ biang kam ha ki por wa nachwa.
