Jowai: Ki ar tylli ki seiñbhalang wa kynthup ya ka All Hynniewtrep People United Front (AHPUF) wa ka Meghalaya People Youth Confederation (MPYC), dei sñiawkhia yei eh i khoo ki paidbah ka thaaiñ khappood da pynman ki ya ka yalang paidbah ha Khanduli, West Jaiñtia Hills District, ha kani ka 8 tarik uni u bnai.
I thmu kani ka yalang toh wow wanrah yei sñiawthooh yumut, i yatylli wa i mynsien maya ri hapyrdi ki paidbah ka thaaiñ khappood.
Ha kani ka yalang da emlang kiwa yahkhmat ka Saindur Tip-kur Tip-kha Ieng Ehrngiew Hynniewtrep (STIEH) wa ka Hynniewtrep People Youth Front (HNYF) Jaintia Circle, ki Waheh Chnong na ki chnong waphær waphær kamjooh ki bru wa pawkhnat ka thaaiñ Khanduli.
Ya ka yalang da pynlai da u Thmulangki Sayoo, President ka MPYC, wei da yoh ya ki kyntien ngooh blai na ka Purity Phawa.
Ka Deiwi Tongper, President ka STIEH Central Body da pynsñiaw ko wa kiwa chong chnong kiwa em ha ki thaaiñ khappod chem chitom bha ki neibhah wa kiwa mihkhmat nadooh ki MDC, MLA, MP ym kheiñkor ki ya ki deiwa kyntu leh ya ki wow man ki kiwa yatylli khnang wow ye ki u yaleh pyrchah yei tia pood ka Assam wei wow wanrah yei chongsuk. Da kular ko leh wa ka STIEH ym chong kli kti ko wei u yieñ yaleh ko hadooh wa jop.
Neiliang u Elias Susngi kam u waheh ka Raij Namdong da kyntu u ya ki seiñ wow dawa na ka sorkar wow wai noh ya ka C.H.C Namdong wow pynku kyrdan ya ka Khanduli Sub-Center cha ka ka P.H.C., da pyntip u leh wa ki tiar waroh da poi lut ki ha Namdong P.H.C sah wow thung hi-eh ya kiwa kreh wei wow pynku kyrdan noh ya ka.
Neiliang u Waheh Chnong ka Khanduli u Mulin Rumut da pynsñiaw u yei eh i khoo wa chem ki man ki por nadooh i pyndik ka sorkar Assam ha i khih i kreh, ka rep ka riang, ka khayi pateiñ wei khamtam i wan tia pood ko neipor cheipor.
U waheh chnong warim ka Khanduli u Womris Langshiang da dawa u na ka sorkar Meghalaya wow kyrriah noh ya ka Assam Battalion Outpost na Khanduli cha i thaw wa em nachwa ha Umpawiang, neibhah i em kani ka Outpost da wanrah ko yei eh i khoo ya kiwa chong chnong, khamtam ki kynthai wa khynnah.
U Beril Bynnud da khana u ya ki kaam wa sah yong ka sorkar kam i chna Check-gate, ki kudam wow booh mar rep, ki sarok wa kiwi kiwi. Ka Purity Phawa da klam ko yei wym mano kiwa mihkhmat wei i klam kular wa kut du heipor Election. La 46 snem wa ka Meghalaya da man jylla ko tangwa hadooh katni pu biang u pood wa pura iwa pynyoo wa kiwa mihkhnat ym em ki i kitkhlieh ya ka ri wa ka jaitbru.
U Chandame Sungoh da ong u neipor warim ka Raij Nangtung Khyrwang wa Elaka Nongjrong Labang Nangphyllut kiwa tip kam ka Block-I Block-II em ki hapoh i synchaar ki syiem wa ki Dolloi Hima Khasi Jaiñtia tangwa heipor wa sorjamin (survey) ya u pood neibynta wow pynkha ya ki District Council ha u snem 1951-52 da pynpsiah yabor noh cahpoh ka United Cachars and Mikir Hills District khlem i mynjur ki syiem ki dolloi. Ha u snem 1972 ki bru yong kini ki thaaiñ kyrmen ki wow poi biang cha Meghalaya tangwa da man kam wa sæh kajiar ya ki cha ka jylla Assam. Kani man ko ka kaam wa eh tam ya ki paaid Khasi Jaiñtia wa ka sorkar Meghalaya wow leh, tangwa ymtoh wow dooh kyrmen wei emkaam wow yatylli.
Da khut u ya waroh ki paaid ka Bri u Hynniewtrep wow yatylli ki wow yaklam wa ka Jaiñtia Hills Autonomous Districi Councils, Khasi Hills Autonomous Districi Councils, Meghalaya Legislative Assembly, ka Sorkar Assam wot chadooh ka sorkar pyrdi ha Delhi khnang wow pynbait noh ya u pood.
Discussion about this post