Jowai : Hadien wa da kut i e por ki 13 tylli ki seiñbhalang ynne ka sngi na ka sorkar wei khamtam na ki 7 ngut ki nongmihkhmat yong ka Ri Loom Jaintia wow kynriah noh yow Deputy Commissioner ka West Jaintia Hills Arunkumar Kembhavi kamjooh ya u Addl. SP u Shemphang Syrti wa ki pulit kiwa emkti hei yatoh wa i chah dat chah bom ki khynnah ka Kiang Nangbah Government College, Jowai ha ka 10 tarik uni u bnai kini ki seiñ da chong yalang ki ynne ka sngi ha ophis ka Jaintia Youth Federation.
Katkam ka khubor wa da yoh hadien kani ka yalang ki 13 tylli seiñ chisur da rai ki wa daw khut pynman ki da ka yalang paidbah ha kani ka 4 tarik uni u bnai heipor 11:00 waje i step heiwa daw yoh i yei klam na ki 6 ngut ki nongyalam seiñbhalang, ki manbei wa ki waheh chnong.
Kam wow pynkynmoo heini, kini ki 13 seiñ da dawa ki na ka sorkar wow :
- E noh ko ya ki dawa ki khynnah ka KNGC.
- Wow kyrriah kaam (transfer) ya u DC, u Arunkumar Kembhavi wa ya u Addl. SP u ma Shemphang Syrti na kani ka Distrik hapoh 15 sngi.
- Wow su bailutsan cha ki khynnah kiwa mynsoo ha iwa da jia ha ka 10 tarik
- Wow pyndam noh ya ka FIR khlem booh kyndon pyrchah ki khynnah puræ la KNGC wa ki seiñbhalang hapoh 24 kynta.
Heijooh i por ki 13 seiñ da kyntu ki ya ki paidbah, ki manbei manpa, ki waheh chnong wa waroh kitu wa chah ktah kiwa mynsoo ha ka 10 u Khonchonglad wow em bynta lang ki ha kani ka yalang paidbah.
Discussion about this post