Ka DC ka East Khasi Hills District da pynmih hukum ko hadien wa da yoh boon ki ujor yei pynheh sur lyngba ki Loudspeaker/PA System/Music System hawa pynman ya kiwa boon ki lehkmen wa ki yalang paidbah.
Hajrong ini, ka hukum da ong ko wa kiwa pynman ya kini toh u pyntikna ki wym toh de u tem sur nadooh 10:00 waje i miet hadooh 6:00 waje i step wei ini leh man ko kam chibynta wow bood yaka hukum ka Supreme Court ka India.
Da ong leh wa lada man katwa man leh hap wow bood yaka hukum ka Supreme Court kawa da pynmih ha ka 18-07-2005 heiwa i ood i sawa toh u man ko katkam ka aiñ Pollution (Regulation & Control) Rules 2000 heiwa ha ki thaw wa em karkhana ymtoh wow ood palat 75 dB(A) Leq heipor sngi katwa heipor miet toh u man ko 70 dB(A) Leq.
Ha ki thaw wa em ki yaaw ki haat, ymtoh u ood palat 65 dB(A) Leq heipor sngi katwa heipor miet won 55 dB (A) Leq.
Ha ki thaw wa sah ki paidbah ymtoh u ood palat 55 dB(A) Leq heipor sngi katwa heipor miet won 40 dB(A) Leq.
Kiwa pynman yalang toh u pyntikna ki wa i sur wa mih na kini ki jait tanghæng ymtoh u ood ki hadooh wa sñiaw cha ki thaw wa em chajan wei lada jia wa pynthut ko yei chongsuk chongsaiñ daw chah pynchitom katkam ka aiñ.
Discussion about this post