Kam chibynta i lehkmen wa kyrpang ka lyngkhooh snem yoh laitlooid ka ri namo ka 80th Independence Day ka India, da pyntip wa ka Lok Bhavan, Shillong daw wai ka neibynta ki paidbah ha ka 15 wa 16 tarik uni u bnai yow e laad ya kiwa chong chnong wow sakhi ki yei lehkmen wei kamjooh i mynsien laitlooid deilang ka dustur riti ka India deilang ka Meghalaya.
Ka Lok Bhavan daw wai ka nadooh ka 1:30 PM hadooh 8:00 PM ha ka 15 tarik u August 2026 wa nadooh 11:00 AM hadooh 8:00 PM ha ka 16 tarik u August 2026. Ki paidbah ym hap ki wow su iyi iyi yow psiah chapoh ka Lok Bhavan wei ha kini ki ar sngi daw yoh leh u sakhi ya kiwa boon ki rwai, ki chaad da ki bru na kylleiñ ka ri kam wow pynyoo rong ya ka dustur ka riti wa ki rwai ki chaad tynre na kylleiñ ka ri India.
Ki paidbah daw yoh ki wow sakhi ya ka chaad Bhawai Dance ka Rajasthan wa ka chaad Kalbelia ki jaitbru wa im ha ka ri chyiap ka Rajsthan hi.
Na Jammu and Kashmir daw yoh yei chaad Dogri ka thaaiñ Jammu, i chaad Kashmiri ka thaaiñ Kashmir, i chaad Gojri wa i chaad Pahari na ki thaaiñ khappood ka Jammu and Kashmir wa kiwi de napoh kani ka jylla.
Na Karnataka won daw em kiwa chaad Bharatanatyam kawa man kawi na ki jait chaad warim bha hapoh ka ri wei daw emlang ki bru kiwa na Sangha wa Mandya.
Daw em leh kiwa mihkhmat ya ki Khasi, Jaintia wa Garo kiwa daw pynyoo yei mahajon ka jylla ha i riti dustur.
Najrong kini daw em leh ka Military Band na Assam Regimental Centre kiwa daw tem ha Lok Bhavan ha waroh ar sngi.
Daw em leh i pynyoo rong ya ki syntu, ki soh ki pe, ki mar pynriam yung deilang i dai baam tynre wa kiwi de.
Hei janmiet daw pynche ya ka Lok Bhavan da ki le rong ka lama ka ri.
Discussion about this post