Da ki hajar klur paan yarap poisa ka jylla Meghalaya naka Finance Commission

Shillong: Ka sorkar Meghalaya Democratic Alliance (MDA) ynne ka sngi da paan ko T. 82,815 klur naka 15^th Finance Commission wa kynthup yaka T. 62,870 klur (Pre-devolution revenue gap).

Kani ka poisa wa da mang neibynta ka 5 snem da wanrah da u montri rangbah u Conrad K Sangma hakhmat ka 15^th Finance Commission wa khlieh da u Nand Kishore Singh ynne ka sngi ha Shillong.

Ka sorkar jylla da paan ko leh T. 15,609 klur kam ka Grant-in-aid yow pynim ya ki Company ka sorkar kiwa da jan yap.

Ini kynthup T. 4,956 klur wow chna sarok wa ki yingkeiñ, T. 2,476 klur yaka chnat bordiñ, T. 2,199 neibynta ka Sports and Youth Affairs, T. 1,114 wow saam um wow chna paikhana, T. 1,048 klur neibynta ki pulit, T. 957 klur neibynta ka puræ puthi wa T. 580 klur neibynta ka chait ka khiah.

Related posts

Ki paidbah pynbor ki ya kiwa mihkhmat wow wan cha ki yalang tangwa chah khñium won lada pynemkaam Siren: Paul

November 18, 2024

Dam noh ka NPP wow kyrchaan ya ka sorkar ka Manipur wa yahkhmat da ka BJP

November 17, 2024

Nalor ini ka sorkar jylla da paan ko sa T. 2,469 klur yow pynchna pynmiat ya ki yung krehkaam ka sorkar, T. 1,567 neibynta ki le tylli ki Autonomous District Councils (ADCs) wa T. 300 klur neibynta ki SPSU.

Hadien ka yalang, u Chairman ka 15^th Finance Commission, u NK Singh da pyntip u cha kiwa thoh khubor wa kiwa yahkhmat yaka jylla Meghalaya yaleh ki wow pynkhlaan yaka muna poisa ka jylla wei katkam wa pyntip ki hakhmat ka Commission kamwa pait kattæ man ko kawa ye u leh.

“Tangwa ym ye ki u chaniah du haka Commission wow yoo wyrai ya ki wei chwa wow e i yaka rai wa khadooh chwa wow kut u snem u man ko leh i yaleh yong i wow yoo waka Meghalaya u yoh ko ya i yarap yow yoh ko yaka GDP kawa heh wa san katkam wa da yooluti ki paidbah ka jylla Meghalaya,” da ong u Singh.

Da ong u leh i yoh i kot kiwa chong chnong ka Meghalaya duna bha ko hawa wyrchaw wa kiwi ki jylla wei ka GDP ka jylla ynnin u snem ku ko 11% tangwa manda kheiñ nadooh u snem 2011 hadooh 2018, ku ko kamwa 5-6% iwa duna bha hawa pait ha waroh ka ri wei kamjooh leh duna ko ya kiwa ye ki kattu katni ki jylla ka thaaiñ mihsngi wow ku.

Chooh chooh da ong u wa ka Meghalaya toh u pyrchang ko wow pynmih poisa dei bor yong ka hi khlem paan yarap ware naka sorkar pyrdi.

Neilaing u Conrad ha ki ktien waiphang u da ong u wa ka jylla em ko chiboon kiwa ye u pynmih poisa tangwa nynkong emkaam poisa wow sdang heiwa ka sorkar da sdang ko yaka Muga Mission, Aroma Mission waka Lakadong Mission wei i em wa i rukom man ka jylla wei jngai ko na kiwi ki jylla da man ki kam ki moochynthut.

Da ong u leh wa u pood waka Bangladesh kawa man boon ki por wa wanrah boon ki chitom tangwa lada wai ya u pood ye ko u wanrah ya iwa boon i yoh nong haka kahyi pateiñ.

Da klam u leh yeiwa ktah i khang ya i tih mooyong yaka jylla wei ka sorkar dang yaleh ko wow pynbait ya ini.

Da pyntip u leh wa u snem 2022 u man u uwa emkaam bha yaka jylla u wow man leh u lyngkhooh dap 50 snem ka jylla wei u pynman leh yaka National Games haka jylla i wow man leh i sarong yaka jylla.

“Em boon ki moochynthut ha i jooh i poor ki laad ki luti wa wai wei deiwa pynemkaam ya ki Policy wa biang wa i pynlai yaka poisa deiwa biang wa i yakrehlang daw ye u pynman sakhiat ya waroh iwa angnood ka jylla,” da ong u Conrad.