15 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1

Da ki hajar ngut toor biang ki paaid ka Elaka Sutnga cha pchem u DC pyrchah ya ki karkhana Coke

Advertisement ad1
Advertisement ad1
Advertisement ad1

Neidaw wa ka sorkar jylla wym bna ko wow leh iyi iyi hajrong i mih roi ki karkhana Coke hapoh ka Elaka Sutnga, wot hadien wa neiliang ki paidbah hapoh i yahkhmat yong ka Environment Co-ordination Committee (ECC) da pynsñiaw ki yei pyrchah yong ki ha ki rukom waphær waphær hadooh wow pynman yei lai paidbah chisien, kamtæ ynne ka sngi da ki hajar ngut ki paaid yong ka Elaka da lai toor biang ki cha pchem u Deputy Commissioner, East Jaiñtia Hills District ha Khliehriat yow pynkynmoo ya ka sorkar wa toh u pyndooh pyndam syndon ya kitai ki karkhana Coke najrong wa da chna ya ki pyrchah ya ka aiñ, da booh ki leh hei maa yei chait i khiah ki paidbah.

Ya ka lai paidbah namo ka Rally da sdang na Moopala wei da lai ter ter u sarokbah chadooh cha Khliehriat deiwa lai toor cha pchem u DC deilang wa ki Placard yow beiñ joor ya ka sorkar jylla hajrong i wym mano ko yei dawa yong ki.

Advertisement ad1
Advertisement ad1

Uwa e buit ka ECC, u Reading War da ong u 31 tylli ki karkhana Coke da yaleh ki ya ka CTE (Consent to Establish) yow sdang chna ya ka karkhana naka Meghalaya State Pollution Control Board tangwa kini waroh toh kiwa da dep chna chwa hanla ka aiñ ym chah ko ya kiwon kiwon ki kharkhana wow chna chwa dep te yaleh ya ka CTE, wei neiliang ka sorkar wot hawa ka da tip ko ya ini leh, ym em leh ko iyi iyi wow pynchitom ya ki katkam ka aiñ tangwa da pyrchang pathan ko wow pynbiang ya ki kot ki sla.

Neitæ iwa pynkhyrngiat leh ya ki wa ka sorkar ong ko wa kitu ki karkhana wa da yoh CTO (Consent To Operate) ye ki wow kreh, tangwa hadien wa da yoh da ka RTI da chem wa chiboon i duna heiwa ka sorkar hapoh ki chnat krehkaam waphær waphær wym em lai ki katkam ka aiñ. Heijooh i por leh wot hapyrdi i yakhih yong ki paidbah leh dang em biang kiwa da yoh bor naka sorkar. 

“I kwah yong i wa wot kitu kiwa yoh CTO (Consent to Operate) leh toh u khang khyrdep, wei iwa khaddooh hi ym kwah i ya ka CTE næ CTO, neibhah ka aiñ leh ym chah ko, wot ka Supreme Court leh da batai ko wa ya ki karkhana wa maa namo ki Hazardous Industries wym toh u e bor wow chna ya ki hajan ki thaw wa em chnong, ki thaw wa sah bru wei ki bru em ki ka hok wow lait nei jakhlia yong ka rymaw kawa man leh kam chibynta ka hok wow im,” da ong u Reading War.

Kamtæ da kyntu ya ka sorkar wa toh u pyrkhat bha neibhah ha East Jaiñtia ka yoh um ko deiwa pynlang umslap, katwa kini ki karkhana won ki pynmih ki ya ka la-ær wa jakhlia (Carbonic Acid) kawa daw pynman leh wa ya ka um leh ym hoi de u pynemkaam.

Ha chwa wow pynman ya ka lai paidbah da em ka yalang wa pynman ha madan Moopala kawa pynlai da u Chairman ka ECC u D.H. Mallang wei da pynman leh ya ka yalang ha pchem u DC heiwa nyngkong ym chah wow psiah ki paidbah neidaw wa da boon ware ki.

Ha pchem u DC da pynman leh ya ka yasoi pyrtuid pyrchah ya ki karkhana Coke wei da yoh leh yei klam na ki kattu katni wa kynthup nadooh ki dkhot ka ECC, ki khon khynroo, ki manbei manpa yong ka Elaka wa kiwi kiwa da pynsñiaw yei eh wa da maad ki ha ka pateiñ katni deiwa ong wa i ktah wa rap joor toh ha ka pateiñ wa daw wan.

Hadien wa kut kiwa klam, neiliang u DC, u E. Kharmalki da hiar u wow yaklam hakhmat ki paidbah deiwa ong wa ya kini ki dawa yong ki daw pynsñiaw cha ka sorkar lyngba i thoh wa da ekti da ki dkhot ka ECC ha kani hi ka sngi.

Share this:
Previous

E yarap ka ICICI Bank da 8 tylli ki Oxygen Concentrators cha ka West Jaiñtia Hills

Next

Chongkun chongtre ka lehniam Behdieñkhlam Behkymphui ka Raij Mynso