September 13, 2021
Advertisement
Ynne ka sngi ki khon ka Raij Mynso, da pyndep ko ya ka lehniam Behdieñkhlam Behkymphui heiwa kani ka lehniam kawa chisien chisnem da sdang ko nadooh ka 11 tarik uni u bnai heiwa da pyndep ya ki lehniam wa boonjait katkam ki sarin yong kani ka Behdieñkhlam Behkymphui.
Ynne ka sngi pynkut ya kani ka lehniam chwa wow sdang ka bynta wow pyndep ya ka lehniam da em ka yalang wa tbian ha yung Seiñraij Mynso ha Pdeiñ Tyllu heiwa u MDC ka Nonjngi u E. Teron da man u kam u kongsan hei emlang Dolloi ka Elaka Mynso, u Karmi Myrshiang, u Hanjhan Dkhar kam u Sectreary ka Niamtre 12 Dolloi, u Kamnipaia Challam wa kiwi kiwi.
Ya kani ka yalang da pynlai da u H. War, heiwa da yoh ya ki kyntien Ngoohblai na ka Synchar Passah, ki kyntien pdiang burom na u K Situng.
Kani ka Behdieñkhlam Behkymphui toh ka lehniam ki khon ka Niamtre ka Raij Mynsoo hachwa wow wanrah ya u kba u khoo na hali cha yung wei wow yada ya u kba wa kiwi ki mar rep na i sih wa i baam khñiang wei khamtam leh wow yada ya ka chnong ka thaw, ka Raij ka Elaka na i kjut i chitom saja wa kiwi kiwi iwa man i sih iwa ye u ktah ya ka imlang sahlang.
Chooh chooh kani ka lehniam da pyndep ya ka hajrong wow paan i yada, deiwa engooh edem ya ki Blai ki Syiem, ki Blai Ryngkaw wow e ki yei yada kamjooh leh i kyrkhu kyrdoh ya ka imlang sahlang waroh kawi.
Ynne ka sngi hadien wa da kut ka yalang na Yung ka Seiñraij da hiar won cha Yung Langdoh wow pyndep ya ka engooh edem wa i suit i choor yeiwa da pyndep da ki waheh ka Raij kam u Langdoh, u Dolloi wa kiwi kiwi.
Hadien wa pyndep yei suit i choor, da mih na Yung Langdoh deiwa rah ya ki kymphui kiwa man ki dieñ wa da tah hei saphup wei da sæh ya ki kattu katni tylli ha tymbud luti nadooh na Khloo Blai cha Yaaw wow tyngkheiñ ya ki chken wa da pynthiah harood sarok kam ka dak wow tyngkheiñ ya ka khlam yeiwa da pynbood won sa i engooh ya ka Um Ñiawwyrnai kawa em ha yaaw chwa wow hiar cha kani ka um.
Na yaaw da mih wow lai cha i thaw wa tip kam ka Tre Madan Mari heiwa da pyndep ya ka Kñia Syiem Khlam Syiem Dait heiwa da e kñia da kawi ka sniang.
Ka lehniam ynne ka sngi da man ko kawa lai bait wei kawa phooh wa phieñ heiwa da pyndep ya ka katkam ki hukum ki adong yong ka Niam wa da sikai da pynjooh nadooh warim.
