Ynne ka sngi ka NPP Nartiang Block Committee da pynskem ko ya kiwa kitkaam yong ka ha ka yalang bah wa da pynman ha Iaw Pynsiñ, Wahiajer heiwa da ki hajar ngut ki paidbah da wan tooid ki cha kani ka yalang.
Ha kani ka sngi deilang wa u Montri ka jylla uwa man leh u MLA ka Nartiang, u Sniawbhalang Dhar da wan embynta leh u Montri ka sorkar uwa man leh u MLA ka Mawhati, u Dasakhiatbha Lamare, u MLA ka Jowai u Wailadmiki Shylla, u CEM ka JHADC u Thombor Shiwat wa ki MDC ka JHADC.
Ya ka yalang ynne ka sngi da pynlai da u Hamkom Khynriam uwa man u PresIdent ka NPP Nartiang Block Committee, da yoh ya i ngoohblai na u Arnes Kassar, katwa ya ki kyntien pdiang burom na u Sanwotki Laloo uwa man u Waheh Chnong ka Wahiajer.
U Ngaitlang Dhar uwa jooh man u MLA warim ka Umroi hawa e yei klam da ong u, “Jooh ong ki bru wa mahajon i tæ e poisa i ya kiwi tangwa u khana O ya phi i mahajon i mysnien i wow yarap ya kiwi dei kyrkhu yong u Blai.”
Da kyrmen skem u wa u Blai leh u kyrkhu u ya waroh lang kamjooh.
U Wailadmiki Shylla da khana u wa ya ka NPP da seiñ ya ka ha u 2012 wei lada pait ya ki kaam yong ka yoo lakam wa man ko ka seiñ wa da rim bha wei man ko kawa nyngkong dooh wa da tipmit kam ka National Party wei da man ko kawa em MLA wot cha kiwi ki jylla ka thaaiñ mihsngi.
Da pyntip u wa ka Party da pynkhreh ko hadooh 58 ngut ki kyrtong na ka jylla.
Da ong u wa ki sorkar warim da e ko ya ki Scheme wa khian man-u-snem tangwa kani ka sorkar MDA da e ko ki Scheme kiwa heh kiwa chynna thaw nadooh ki yung mane, ki thaw sumaar wa kiwi kiwi wei kattu daw sdang noh sa ya ka Namdong C&RD Block kawa da angnood da ki paidbah da ki phaw snem nachwa katwa kamtæ u Sniawbhalang Dhar da pteiñ u wow wanrah ya ki kaam pynroi neibynta ki khon ki kti.
U Dasakhiatbha Lamare hawa e ya i klam da ong u wa kam uwa mihkhmat paidbah man u uwa smat wow e yarap ya kiwi. Da kyntu u ya ki paidbah wow kyrchaan biang ya u Sniawbhalang Dhar wow ye u wow pyndep ya ki kaam kiwa angnood ki paidbah kiwa dang sahteiñ wow leh.
Neiliang u Sniawbhalang Dhar da e khublei u ya u Montri Rangbah ka jylla, u Conrad Sangma uwa da pynlait poisa neibynta ki kreh wa boon hapoh ka Constituency.
Da e khublei u ya ki paidbah wa da wan ki cha kani ka yalang wei da kyrmen u wa na ki wow wanrah chooh ki ya kiwi ki lok yong ki wow kyrchaan ya oo.
Chooh chooh da ong u wa kani ka sorkar toh ka sorkar kawa kreh ymtoh kam kiwi ki sorkar warim ha ka jylla.
Heiyatoh wa ki SHG, da ong u wa dang ha ka sorkar Congress da em du 4000 tam donhi ki SHG, tangwa nei kreh ka sorkar wa katni da em 45,000 tylli ki SHG.
Da ong u wa ki paidbah man ki kiwa da stat katni wei katkam ka yutip wa da yoh na ki chnat pulit (Intelligence) da ong wa ka NPP daw wan ko hei bor ha kani ka kynti.
Chooh chooh da khana u wa i daw wa ku ka NPP toh neidaw wa em i krehlang hapyrdi yong oo, u Symbood Montri Rangbah wa u Montri Rangbah ymtoh kam kiwi kiwa em ya ki Team A, Team B kam kiwi ki Party.
Kiwi kiwa da e i klam ha kani ka sngi kynthup ki ya u MDC ka Ummulong-Moodymmai, u Jesse Suiam, u Thombor Shiwat, u Damian War uwa man u Waheh Chnong ka Namdong-B, u Briwon Pohshna na Ummulong, u Bajop Pyngrope uwa man uwa e ktien ya ka NPYF wa kiwi kiwi kiwa da kyntu ya ki paidbah wow e i kyrchaan biang ya u Sniawbhalang Dhar ha kani ka kynti.
Da pynphooh ya ka yalang da ki chaad wa har rukom.
