Mawkyrwat: Da man ko ka sngi wow sahkynmoo ha ka khana parom ka thaaiñ Ranikor heiwa da ki hajar ngut ki paidbah na kylleiñ ki chnong wa ki dong wa marjan ka chnong Ranikor da wan ki wow sakhi ya i wai ya u moo-yurim ya ka Ranikor Civil Sub-Division wa kamjooh ya ka yungkrehkaam ynne ka sngi ha Ranikor.
Kani ka Civil Sub-Division wa thymme u kynthup ko ya 160 tyll ki chnong wa ka sorkar jylla lyngba u symbood montri rangbah, u Prestone Tynsong, da pyndep u ya ka kular wa da khlai ha ka 12 tarik u Naiynru, 2018 ha ka sngi heiwa u montri rangbah ka jylla u Conrad K Sangma da wan u cha ka thaaiñ Ranikor.
Neiliang ka Ranikor Civil Sub-Division Demand Committee da pynsñiaw ki yei sñiawngooh ya ka sorkar jylla wa ya u montri rangbah u Conrad K Sangma, lyngba u Kitborlang Nongrem, heiwa ka Ranikor Civil Sub Division Demand Committee da e burom ko ha u Prestone Tynsong kawi ka sahkti ksiar.
“Hadien ki dorkhat dawa Civil Sub-Division kiwa boon tylli ha ka por ka sorkar MUA-II kiwa ym em man kaam, ha 25 tarik u Naisan, i da lai yachem i ya u montri rangbah ka jylla u Conrad K Sangma uwa da chimkhia deilang wa u Prestone Tynsong wow wan sylli ya ka Ranikor ha ka 12 tarik u Naiynru”, da ong u Kitborlang, uwa joo ki umkhmat wa kmen heipor wa klam u.
Discussion about this post