Da ki khoh, ki chang, ki kchu heithaw ki muna Plastic lai yaw ka AJMRWLU waka KYWM

Yow pynyoo nongmuna yaki paidbah hajrong ka thong u pyndooh pyndam yei pynemkaam Plastic hei im wa man-ka-sngi khamtam hawa lai yaw lai dukan, neibhah wa ka ktah ko yaka rymaw waka imlang sahlang. Kamtæ ynne i step ki dkhot ka All Jaiñtia Muster Roll Workers Labour Union, Jowai Unit wa ka Khooid Yaka Wah Myntdu da mih lai yaw ki ha Jowai deiwa rah na yung ki muna jun, ki khoh, ki chang, ki kchu song ja wa ki kchu neibynta u thap ya ki jhoor ki doh wa thied na yaw.

Ini i leh yong ki toh yow pynsñiawthooh yaki paidbah wa chongdai wym toh de u e muna Plastic ki neini chakhmat kamjooh leh kiwa thied toh u pynemkaam ki daki muna that.

Heini i lai yaw da sdang na yaw chyiap ter ter cha yaw CNI, Iawmusiang, yaw District Council wa kiwi. Heipor wa lai thied ya kitu kiwa dai wa pyrchang e muna Plastic da kyntait ki deiwa ong leh yaki u sangeh noh i e Plastic neibhah kamwa man kattæ ka rymaw da chah ktah bha ko haka Plastic neidaw wym toh kawa pyut, najrong wa pynyoo nongmuna leh yei jhep wa lang haki yaw ki haat wa boon hi toh ki da ki Plastic.

Neiliang kiwa chong yaw leh boon hi mynjur ki yeini deiwa ong najrong wa ktah ko yei sñiaw yong ki,  ktah haroh ko yei kamai wa hap ki u thied hei dor wa syad. Tangwa neidaw wa kiwa thied won paan  Plastic bait ki kamtæ ym yohsa ki wow e. 

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

U K.L. Pariat, President, Khooid Yaka Wah Myntdu waka Dayoo Iakai, President All Jaiñtia Muster Roll Workers Labour Union, Jowai Unit hawa klam cha kiwa thoh khubor kyntu ki ya kiwa thied leh u sangeh noh ki u paan muna Plastic deiwa pynemkam daki kynja Tiffin, ki kchu, ki muna wei lada em won i khep wa hap pynemkaam Plastic leh toh u sait manda poi yung neibynta u yoh pynemkaam biang. 

“Ka plastic da booh ko hei maa wei da poi i haka kyrdan wa lym ye u pyndooh pyndam yaka, hap i wow maad yei sma i tung, najrong wa ka umbaam umdih ha wah Myntdu leh da sdang dap Plastic,” ong u K.L. Pariat.

Chooh chooh kyntu u yaki bor sorkar wym toh du wow pynmih du ka hukum pynsangeh i pynemkaam Plastic neipor cheipor, tangwa da toh i por wow phah hiar madan haroh ki yaki bru yong ki yow pynrkhiñ ha yaw ha haat.