Ka MLA ka East Shillong, ka Dr. M Ampareen Lyngdoh da pynsñiaw ko yei kyrchaan ya i klam u Montri Rangbah, u Conrad K Sangma heiyatoh wa i pynbait ya u pood yong ki 6 tylli ki thaw heibynta wa nyngkong, wa ymye de wow uiñ dien ya i rai hadien wa da soi ya ka soskular (MoU).
Da ong ko wa heipor wa pynsñiaw paidbah da ki Regional Committee da elaad lut ya waroh kiwa embynta chwa wow soi ya ka soskular namo ka Memorandum of Understanding (MoU). Hajrong won i wym hun ki paidbah ha ki kattu katni ki thaw, da ong ko wa ka kyrchaan ko yeiwa ong u Montri Rangbah heiwa da ong u wa da elaad wow pynsñiaw nadooh nachwa ha ki Regional Committee tangwa katni won da dær ware i por.
Ka Ampareen da ong ko wa ka sorkar dadep elaad ko ya waroh ki seiñ wa embynta ha ki kaam pynbait pood, wa kynthup ya ki seiñ saiñpyrthai, ki seiñ, ki bru samen wow pynsñiaw ki deiwa thoh lane deiwa yachem wa ki Regional Committee.
Da ong u wa ki seiñ saiñpyrthai da toh wow pdiang ki ya i rai wow pynbait ya u pood ha ka bynta wa nyngkong, deiwa pynrap wa kani ka sorkar MDA da leh ko yeiwa emkaam wow pynbait noh ha ka bynta kawa nyngkong, wei dang emkaam wow pynbait ya ki kattu katni donhi heini heitai deiwa pynrap wa kitu kiwa embynta ym toh wow dooh kyrmen neibhah ye wow phah dei thoh cha ka sorkar India kawa ye wow pynbait yeiwa kulmar.
Ka Ampareen da ong ko wa ki seiñ saiñpyrthai toh wow chim ki ya ka luti deiwa em i kitkhlieh, ymtoh wow pynman kaam Election donhi ya ka, lym kamtæ ymye de wow pynkut yeini.
