Ka Indian Red Cross Society, West Jaiñtia Hills District ha ka 20 tarik uni u bnai da pynman ko yei e snaam sñiawbha ha Blood Bank Jowai, wei napyrdi ki 29 ngut kiwa da wan, 21 ngut kiwa yoh u e snaam.
Neiliang ka Indian Red Cross Society kam ka dak wow sñiawngooh ya kiwa wan chakhmat wow e snaam ha kani ka sngi, da e kti haroh ko cha ki da ki kymmor wa kiwi ki tiar.
Chwa u sdang i e snaam da em ka yalang tbian pynsñiawthooh hajrong i emkaam i e snaam hei emlang ka Dr. I. Khynriem, Senior Medical and Health Officer, In-charge Blood Bank Jowai deilang kiwa kreh ka Blood Bank, neitæ kiwa yahkhmat ka Indian Red Cross Society, West Jaiñtia Hills District wa kynthup ya u Chairman, u W. Lyngdoh, u Secretary, u Ohiwot Laloo, u Asst. Secretary u H. Nongpluh deilang ki dkhot.
Ka Dr. I. Khynriem hawa klam ha kani ka sngi ong ko, i e snaam sñiawbha man iwa emkaam bha neibhah ha man ka ar second da em u næ ka bru wa emkaam u yoh snaam, kamtæ lyngba kam ini i e snaam sñiawbha ye u pynlait im ya ki bru wa em ha kyndian i im lym yoh snaam, wei na uwi næ kawi ka bru wa bien u wan chakhmat u e sñiawbha yei snaam, ye u pynlait im hadooh 3 ngut ki mynsiem bru.
Hawa yaroh ya ka Indian Red Cross West Jaiñtia kawa chim ya kani ka luti wow e sñiawbha dei snaam, pyntip haroh ko wa ya i snaam wa chim ye u pynemkaam du hapoh 35-42 sngi, na itæ i daw emkaam u poi kiwa e snaam neipor cheipor, neibhah wym em de da kawi ka laad chisien wa da emkaam snaam.
Ka Dr. Khynriem da batai haroh ko yeiwa emkaam u leh chwa wow e snaam wa kamjooh leh iwa hap pait bniah neiliang ki Doctor chwa u chim snaam.
Kamtæ kyntu khut ko ya kiwon kiwon kiwa em yei doh i pran wa chait wa khiah wei em yei sñiaw para bru wa toh u wan ki chakhmat u e sñiawbha yei snaam neibhah ymtoh iwa ktah yei chait i khiah ki bru.
Weiwa i e snaam sñiawbha toh kawi ka bynta wa khroo tam wa ye u yarap ya ki para bru.
Discussion about this post