Ki khynroo khyllood wa puræ ka Jowai Polytechnic lyngba ka Technophilia 2 (A Technical Exhibition) wa da pynman ynne ka sngi, da pynyoo pyrthai wei pynyoo rong yei sap i phong wa da yoh sikai ki na kani ka chlem puræ wa kynthup i chna ya ki kor ki bor kam ki kari, ki Motor Cycle soo chaka, le chaka wei ar chaka, neitæ ki Bicycle, ki kor kynrih chyiap wa kiwi najrong ki buit wa chna pynwandur ya ki yung ki sem, ki yung krehkaam, i dro dur wa boonjait wa kiwi de.
Hapoh ka Jowai Polytechnic em ko ya ki chnat puræ Architectural Assistantship, ka Automobile Engineering wa ka Costume Design & Garment Technology.
Ha kani ka sngi u Vijay Kumar Mantri, Commissioner & Secretary ka chnat puræ puthi ka sorkar jylla da man u kam u kongsan chirup i emlang u F.B. Ramseij, Joint Director (Technical) Directorate of Higher and Technical Education (DHTE), u F. Rumnong, Deputy Director (General) Directorate of Higher and Technical Education (DHTE), u Principal ka Kiang Nangbah Govt. College Jowai, u H. Toi kiwa sikai ka Jowai Polytechnic wa kiwi.
U kongsan da pachat u hajrong i emkaam u kylla na i puræ lyngba ki kot cha i puræ wow e yei stat i chemphang wa ki sap krehkaam (Practical Skill-Oriented Learning).
Da pynchlur u ya kani ka chlem puræ wow pynlai yumut khamtam heiyatoh i e sikai wa pynemkaam da ki kti næ i kreh wa pna leh hi dei kti lyngba ki Laboratory, ki Workshop wa ki Project nadooh wa sdang i puræ.
Da ong u leh wa ha ka juk katni i stat i tip da nang suk u yoh lyngba ki rynsan Digital wa Artificial Intelligence (AI), da ban haroh u wa i sap krehkaam wa i stat pynkrehkaam leh da nang emkaam chooh chooh yow pynbiang yei dawa ki karkhana.
Da kyntu haroh u ya ka Jowai Polytechnic wa toh u pynkylla wei pynpliah yei rukom sikai katkam i kylla ka juk Technology.
Da khut kyntu haroh u i yakrehlang wa khlan wa ki chnat kharkhana wei pynchlur u leh ya kani ka thaw puræ wow thooh ko ki buit ki laad kammon u yoh kreh wei wow pna ye pynmih poisa heiyatoh wa i rukom chna yung chna sem. Da e buit haroh u wow yakrehlang wa ka Office u Deputy Commissioner neibynta u thooh ki laad ki kabu yow ya chimbynta ha ki Project sorkar wa chakhmat.
Discussion about this post