Ynne ka sngi u kyrtong ka NPP na 3-Raliang Constituency, u Comingone Ymbon da pynman u ya ka yalang ha Phramer, West Jaiñtia Hills wei da pynbood won ya ka da ka Rally heiwa da ki phaw hajar ngut ki paidbah da wan ki na kylleiñ ki chnong kiwa em hapoh ka Constituency.
Ha kani ka sngi da sakhi ya ki paidbah wa wan wa da ya chaad ki wei kamjooh da ksohkti wei da kdung ki ya u Comingone kam ka dak wow pynyoo yei maya yong ki ya oo.
U MDC ka Nongjngi, u Eveningstar Teron hawa e yei klam da ong u wa ym emkaam wow kyrchaan ya ka TMC ha kani ka Election kawa da kular wow e kreh da ki lak tylli tangwa manda lai ha nongbah Kolkata daw sakhi ya ki hajar ngut kiwa khrong, katwa kamtæ ini pynyoo i wa lada ha Bengal ymye ko wow e kreh kammon won cheini u ye ko. Da kyntu u leh ya ki paidbah wow kyrchaan ya u Comingone sa ha kani ka kynti neibhah wa dadep kyrchaan ki ya oo la le sien wei emkaam u kyrchaan biang ki ya oo ha kani ka kynti.
U Comingone hawa e yei klam da ong u wa i daw wa pynman ya oo wow jop u la le sien toh pynyoo i yei maya ki paidbah ya oo wei da kyntu u ya ki paidbah wow kyrchaan biang ya oo wow pyndep ya ki kaam wa dang sahteiñ.
Heiyatoh wa i beiñ kiwi ki kyrtong ki Party, da ong u wa kiwi ki kyrtong ye ki wow beiñ ya oo har rukom tangwa ki paidbah da sakhi ki yeiwa da leh u ha kini ki le sien kiwa da man u kam u MLA yong ki.
Da ong u wa ki paidbah ka Constituency wa lada em kiwa kwah u leh RTI ye ki khnang wow chem yeiwa da leh u hapoh ka Constituency wei ki seiñbhalang leh chem ki iwi wot leh ym em wa duna wei wot ki leh ymyoh ki wow beiñ ya oo.
Heiyatoh wa i ku dor i phñiang i Petrol wa ki mar, da ong u wa leh ka sorkar BJP ha sorkar pyrdi heiwa da ong u wa ka sorkar BJP toh kawa kwah u wanrah ya ka jooh ka niam wei i jooh i ktien deiwa kdaw leh yei chah sliah ki yungmane manda wan ka BJP heibor kamwa jia ha Assam.
Heiyatoh wa u pood da ong u wa ka 50 snem nachwa ym em wa leh iwon iwon tangwa ha kani ka sorkar wa katni da ye ko wow pynbait ya u pood u ang wei katni sah sadu ka Block I wa ka Block II.
Chooh chooh da ong u wa kani ka sorkar da rai ha ka yung dorbar chna aiñ wow pdiang ya ka ILP wei neiyi i daw won ka sorkar BJP ha Delhi ym e ko ya ini kamwa kwah ki paidbah ka jylla.
Chooh chooh da kdaw u leh ya i tyrwa ka sorkar wow pynpsiah ya ka ktien Khasi wa Garo ha ka Khyrnit wa Phra ka riti synchaar ka ri tangwa ini dang man bait iwa sahteiñ ha Delhi.
Neiliang yong oo da kyntu u ya ki paidbah wow kyrchaan biang ya oo sa ha kani ka kynti leh khnang wow ye chooh u wow e chakri ya ki.
Ya kani ka yalang da pynphooh pynchongchit da ki chaad na ki khynnah, ki khyllood wa kamjooh na ki manbei.
Hadien ka yalang da pynman ya ka Rally wa da chimbynta da ki hajar tylli ki kari kiwa da lai na Phramer, Muthlong, Pasih, Kyndongtuber, Pamanik, Mulieh, Mookyndeng, Raliang wei da pynkut ya ka ha Shangpung.
