Ynne ka sngi, ka NPP da pynman ko ya ka yalang paidbah ha madan Jrisaleiñ, Jowai heiwa da wan ki heh yong ka nadooh u Montri Rangbah ka jylla, uwa man leh u khliehdooh ka NPP, u Conrad Sangma, u Symbood Montri Rangbah, u Prestone Tynsong, ka Ampareen Lyngdoh, ki kyrtong ka NPP na Ri-loom Jaiñtia wa kynthup ya u Sniawbhalang Dhar, u Comingone Ymbon, u Wailadmiki Shylla, u Habahun Dkhar, u Stephanson Mukhim, u Comingong Ymbon deilang wa kiwi kiwi de ki heh ka Party.
Chwa ka yalang, u Conrad Sangma da lai u dei kjat na Police Point New Hill na Iawmusiang ter ter chadooh cha Madan Jrisaleiñ heiwa da em da ki phaw hajar ngut ki paidbah kiwa da yang najrong wa boon kiwa da yang cha luti syngkeiñ wa kiwa lai kjat lang.
U MLA ka Jowai, u Wailadmiki Shylla da e u ya ki kyntien pdiang burom deiwa kyntu ya u Conrad wow kyruiñ cha ka Ri-Loom Jaiñtia ha ki snem wow wan.
U MLA ka Nartiang, u Sñiawbhalang da kynmoo u yei klam u Dr. RC Laloo ini wa dep wa ong u wa chah iehbeiñ ka Jowai tamgwa da pynkynmoo u ya ka Jowai Water Supply Scheme kawa nadooh u 2003 wa sah tangwa katni dei em u Wailadmiki da ye wow wai ya ka.
Heiyatoh wa ka Municipal da ong u wa wanrah da u Dr. RC Laloo uwa dep wanrah tæ iehbeiñ ya ka tangwa oo won kam u Montri ka chnat pynroi sor da leh u yeiwa emkaam heiyatoh wa ini.
U Prestone Tynsong hawa e yei klam da ong u wa san snem nachwa ka yalang ym em u dap ka madan tangwa ynne da chlai ko wei heitu i por da yoh 3 MLA na ki 7 ngut na Jaiñtia kamtæ kyrmen u wa ha kani ka kynti u yoh pyn 7 ngut ki MLA da ka NPP.
Da ong u leh wa ym em kiwi ki seiñ na ka thaaiñ mihsngi wow yoh ya i kyrdan National Party kawa da em ya ka yung khrekaam ha Delhi wei wa man ko ka seiñ wow yada ya ki jaitbru kiwa khian paaid.
Chooh chooh da pynkynmoo u leh ya i pynbait pood ka sorkar ka NPP wa ka Assam heiwa yeiwa dang sah leh u pyndep noh. Da maham u leh wa lada bakla u jied ya ka TMC, neibhah i thmu ko toh wow pyndam noh ya ka soskular MoU wa da soi hapyrdi kini ki ar jylla.
Da kyntu u leh ya ki paidbah ka Jowai Constituency wow kyrchaan wei wow jied biang ya u Wailadmiki Shylla ha kani ka kynti.
Heiyatoh wa ki bru wa ong High Level Committee, u Prestone da ong u wa lada em kam katæ toh u e FIR pyrchah ya u Chairman wa u Secretary kani ka Committee.
U Conrad hawa e yei klam da ong u wa nadooh wa sdang ka sorkar ha u 2018 da rai wow kreh ya ki paidbah ymtoh neibynta yong ki bru samen wei yeini da sakhi yei kylla hei rukom synchaar hapoh jylla.
Da ong u wa ka Meghalaya nachwa man ko kawa hiar dooh hei wow pynkrehaam ya ka PMGSY heiwa ha ki 15 snem da chna du 700 Km u sarok tangwa dei kreh chitom kani ka sorkar ha ki san snem wa dadep da chna hadooh 2000 Km ha ka jylla lyngba ka PMGSY.
Da ong u leh wa ha ki 45 snem kiwa da lai da em du 4000 yung kiwa yoh umkor tangwa katni won duna 3 lak tylli ki manyung wa yoh umkor.
Da ong u kani ka sorkar chwa wow chim ya ka rai da booh chwa ya ki paidbah ha khmat.
Chooh chooh da ong u wa u pa yong oo u (T) PA Sangma jooh ong u wa kam uwa yahkhmat paidbah ymtoh u kdong ya ka poisa tangwa emkaam u chakri ya ki paidbah.
Da ong u wa jooh ong ki ha u 2018 wa kani ka sorkar MDA ym neh ko tangwa da sakhi ki paidbah kammon kreh ko wei da neh ko pura 5 snem.
“Ya kiwa klam beiñ pyrchah ya ka sorkar ym ap, tangwa kani ka sorkar ap ko yeiwa emkaam ki paidbah neibynta i bha i miat yong ki,” da ong u Conrad.
Heijooh i por da ong u wa heipor u Dr. Mukul Sangma toh uwa pynemkaam dei bor da ki pulit tangwa ha kani ka sorkar won thooh ko ya ki laad ki luti wow pynbait i kaam lada i yong kiwa sikai, ki seiñ wa kiwi kiwi deiwa jai-jai.
U Conrad da ong u leh wa kani ka sorkar da leh ko chiboon ki kaam neibynta i bha i miat ka jylla kiwa da sah da ki phaw snem.
Hajrong ki kular ka TMC, da ong u wa dang man ko kawa thymme tangwa ki paidbah ka jylla sakhi ki kammon ki MLA ha kani ka sorkar kreh ki wei ha kani ka Election ka TMC u yoh ko du 2-3 ngut ki MLA.
