Ynne ka sngi, ka Hima Sutnga Youth Federation (HSYF) da pynman ko ya ka yalang paidbah wei da pynbood sa i pynpsiah pyrtuid ya ki khon ka Elaka Sutnga chapoh ka seiñ.
Ya ka yalang da pynlai da u Never Lamurong wei da yoh yei pynsñiawthooh ya ki yurim wa krehkaam wei pynkha ya ka seiñ da u President, u Nangbha Nongtdu heiwa da khana u wa ya ka HSYF da sdang ha u snem 2003 wei da pdiang wei pynkupbor ya ka da ka Dorbar Elaka Sutnga ha utu snem.
Ka yurim wa da seiñ ya ka HSYF toh yow man ko kam ka seiñ khynroo wow pait yei long i man ka Elaka ha waroh ki liang.
Neiliang u Secretary, u Samanbha Supoh, da e u yei klam heiyatoh wa i lai luti ha seiñ ha kini ki snem wa kajiak kamjooh ki kaam wa da ye wow pyndep.
Da khana u leh wa ka HSYF daw chna ko ya ka Rehabilitation Centre neibynta u e sumaar ya ki khon khynroo yong ka Elaka kiwa da ngam ha ki jait dih boon jait. Da ong u wa ka Elaka Sutnga toh ka Elaka wa da kyrkhu kyrpang u Blai dei dood wa ka umgnap wei kam ka pateiñ kawa kattæ toh u yatylli ki dei jooh i rukom pyrkhat yow lait kiwa na baar u yooh beiñ ya kani ka spah wa em hapoh ka Elaka.
Da ong u leh wa chiboon ki yaleh wa ka HSYF daw hap ko u maad ha kini ki sngi wa daw wan. Kamtæ da khut da wer u ya ki khon ka Elaka wow man ki kiwa skem ki wym pyrkhat yei myntoi samen wei wow man kiwa smat u mih madan yow yada yei mantre ya ka Elaka.
Da yoh leh yei klam na u Publicity Secretary, u Shanbor Lamare, u Vice President, u Heimon Lamare wa u Asst. Secretary, u Sunshine Pala heiwa waroh kiwa da klam da kyrpaad ki ya kiwa wan cha ka yalang wow psiah ki kam ki dkhot wa pura yong ka seiñ.
Ya kiwa da pynpsiah pyrtuid da pynsmai da u President ka seiñ.
Da pyntip leh wa kani ka Enrollment Drive ym kut ko du ynne ka sngi tangwa daw pteiñ biang ha kini ki sngi wa daw wan deiwa lai kiwa yahkhmat ka HSYF cha waroh ki chnong wa em hapoh ka Elaka Sutnga wow pynsñiawthooh chooh chooh heiyatoh wa i emkaam u pynpsiah dkhot ki khon khynroo chapoh ka seiñ.
Discussion about this post