15 49.0138 8.38624 1 0 4000 1 https://wyrta.com 300 0

Da ki thaw pynyieñ kari wa boon mala u chna ka sorkar wow pynkyllooid ya ki sarok ha Shillong

0 Comments
Advertisement ad1

Shillong: Ka Meghalaya State Planning Board (MSPB) da chim ko ya ka rai wow pachat cha ka sorkar wow chna ya ka thaw pynyieñ kari wa boon mala yow ye ki bru u booh kari heipor wa li booh wei li thooh skur yow pynduna yei sahkut kari hapoh Shillong.

Ya kani ka rai da chim ha ka yalang wa pynman da u Chairman ka MSPB u Lambor Malngiang ynnin ka sngi deilang wa em ki heh ki tnat sorkar kam ka puræ puthi, Police, Public Works Department (PWD), Shillong Municipal Board (SMB) wa kiwi kiwi.

Advertisement ad1

U Malngiang hawa klam wa kiwa pathai khubor da ong u wa i sahkut kari da man i kjut hapoh sor wei ki tnat sorkar u yaleh ki u wow thooh ya ki laad ki luti wow pynduna yeini i sahkut kari wei da yaklam bha leh ya kani ka kaam hapoh ka dorbar sorkar kawa dang dep hi wot.

Da ong u leh lada bait ka sorkar daw chna ya ka thaw pynyieñ ha pchem ka yung krehkaam ka PWD kawa em ha Barik Point neibynta ki skur wa em hajan kani ka thaw wei wow pyntikna leh yei duna ki kari wa pynyieñ cha rood sarok heipor wa wai skur kam ka Seven Set, Pinemount, Step by Step wa kiwi kiwi.

U Chairman ka Board leh da pyntip u wa da phah thoh cha waroh ki thaw puræ kiwa em hapyrdi ka Shillong wow pynemkaam noh ki da ki Bus wow li thooh li booh ya ki khynnah skur wei ka sorkar leh u yarap ko u pynyoh bus ko ya kini ki thaw puræ wei ye leh u pynemkaaam ya ki Bus rong soo kiwa ieh khlem pynemkaam.

U Malniang da ong u wa ka Board daw phah ko leh ya ka sorkar jylla wow booh da u pood hadooh katwon tylli ki kari thymme wa ye u dai wei ka yungkrehkaam ki District transport office (DTO) toh u Register ki du 80 tylli ki kari thymme chi sngi.

“I emkaam i leh wow pyntikna wa ki bru wa thied kari thymme toh u em thaw kset kari ki neibhah katni boon ieh ki ya ki kari yong ki cha rood sarok.”da ong u Malniang.

Advertisement ad1

0 Comments

Leave a Reply