Da ki wym ye u pynsakhiat wa man kam ki tre jylla yoh ki wow lai puræ MBBS na Meghalaya: KSU

Ka KSU da pynsñiaw ko yei wym pdiang yei rukom jied ka sorkar ya kiwa yoh u lai puræ MBBS hapoh ka State Quota ka Meghalaya deiwa ong wa nadooh i por wa pynbna ha ka 23 tarik u Naisaphra, 2023 yei pyrtuid kiwa chah khut wow leh ya ka Screening heiwa da mih i pyrtuid ki dkhar hapoh ka Open Category ki wym tikna toh kiwa chong chnong wa pura ka Meghlaya, ka seiñ da dep ko wow pynsñiaw yei suba wym em biang i rukom leh ya ini waroh.

Heiyatoh won wa ki pyrtuid wa da pynbna ka sorkar kam kiwa da chah jied wow lai puræ MBBS katkam ka bhah wa da booh, da chem wa ki pyrtuid kitu kiwa da pyrchah ka seiñ dang em hi ki ha ka Open Category neibhah ka seiñ da ong ko wa da dep ko wow leh RTI kammon da yoh kot yoh sla ki neibhah kini da pyndooh ki yei bhah yong ki Khasi-Jaiñtia kamjooh leh ki dkhar wa man kam kiwa chong chnong tre ka jylla.

Da ong wa ki dkhar wa da mih pyrtuid hapoh ka Open Category da chem wa 9 ngut kini toh ki wym ye u pynsakhiat yei man tre jylla ki neibhah kawi na ki kyndon ka sorkar jylla emkaam wow em ya ka Permanent Resident Certificate (PRC) na ka jylla, tangwa kini kiwa boon toh kiwa em du da ka Provisional Permanent Resident Certificate (PPRC) kawa krehkaam du 3 bnai hadooh 12 bnai donhi iwa mut mar ya yap kani da kut i man ki kam kiwa chong chnong ka Meghalaya. Kamtæ da kylli wa kammon wa ka sorkar da pdiang ko ya kam kini.

Chooh chooh da ong wa wot ki Birth Certificate kini kiwa chah jied toh kiwa da yoh dang ini wa dep na thaaiñ Garo Hills neibhah katkam ka hukum ka yung bichaar wa lada em kiwa yaleh Birth Certificate hadien chi bnai wa kha, emkaam ki wow rah waka Court Order wei kani krehkaam ko ya waroh.

Related posts

Da boonsien dep u yasyllok wa kiwa chongdai madan, phylla u Paul yei pynbaad wa leh yabor

November 24, 2024

Da 4 lak tam ki Vote jop ka Priyanka Gandhi ha ka Election wa nyngkong yong ka

November 23, 2024

Da e nongmuna ya ka Birth Certificate wa yoh u Md Mahmadul Islam kawa da yoh u ha u snem 2012 yow pynyoo wa oo toh u nong Meghalaya wei ya kani da yoh u khlem da emlang ka Court Order. Wei sa iwi leh wa yoo kulmar toh ya ka Certificate da ong wa da kha ha u snem 2003 tangwa ka tarik Registration won toh ha u snem 2002.

Sa uwi toh uwa da e da ki kot ki sla wa na Bihar wa Rajasthan wa kynthup ya ka Birth Certificate tangwa ya ka PPRC won da yoh na ka chnong Thangskai, East Jaiñtia Hills.

Hawa yatoh won wa ki 3 ngut kiwa em ha ka Waiting List yong ka Open Category da chem wa uwi na kini leh ym biang ya ki kot ki sla wow pynskhiat wa oo toh uwa na Meghalaya.

Ar ngut won ki Khasi-Jaiñtia kiwa yoh nyngkong wei wa ar ha ka Khasi-Jaiñtia Category da toh u yoh u psiah ki hapoh ka Open Category ha ka kyrdan wa 6 wa 7 tangwa da phah ki cha ka Khasi-Jaiñtia Category. Wei ini i leh ka sorkar da pyndooh noh ko yei hok yong kiwi won ki ar ngut ki Khasi-Jaiñtia kiwa em hapoh ka Waiting List ka Khasi-Jaiñtia Category.

Ka seiñ da pynche ko wa ka Open Category ym toh ka General Category wow yoh du ki dkhar tangwa i ktien Open mut i ya waroh nadooh ki Tribal wa ki Non-Tribal kiwa da poi chakhmat katkam wa da lehbha ki.

Ka KSU da pynkynmoo ko leh wa ha u snem 2020 wa da em i leh buit tooh ka chnat Agriculture wow thap ha ka thup Khasi-Jaiñtia Category hanla ki Marks yong ki toh kiwa biang wow psiah hapoh ka Open Category yow lai puræ B.Sc. Agri. Heiwa ka KSU ha itu i por da lai pynsñiaw ko ha u Banteidor Lyngdoh uwa man kam Montri ka chnat rep uwa da phah wut-wut ya ki sahep yong oo wow pynbait yeini i leh bakla wei da thap ya ki hapoh ka Open Category.

Hawa kyruiñ cha u snem wa dep, da ong wa kiwa yoh u lai puræ MBBS yong ka Meghalaya da em ki 87 ngut tangwa ka Montri i chait i khiah da ong ko wa da yoh bhah chooh chooh sa 10 tylli wei da toh u ku cha 97 ngut tangwa manda pait won yei pyrtuid ha uni u snem da mih 92 ngut, kamtæ da kylli cheiwon wiar sa 5 tylli?

Kamtæ da ong wa ini toh du i leh embor wei thombor ya ki tre jylla nadooh ki Khasi, ki Jaiñtia wa ki Garo kamjooh ki dkhar kiwa em hok wow yoh u lai puræ MBBS lyngba ka bhah sorkar. Wei ini da pynyoo leh yei leh kulmar nadooh ka sorkar wei kamjooh leh ki sahep sorkar iwa da ktah wei da pynsih yei mynried ki tre jylla.

Hajrong ini waroh, ka KSU da maham ko deiwa eh wa ka sorkar toh u pynbait smat ko ya ini i kynrum kynram lym kamtæ ka KSU daw hap chim ko ya ka luti kiwa khor yow dawa yei hok kiwa toh u yoh u lai puræ ki jiatbru yong i.